Vervatoxa Meclîsê Cinîyan ê HDPyî Ayşe Acar Başaran bînaya merkezîye ya HDPyî de çapemenîye rê eşkerayîye daye û qisey kerd.

Qiseykerdişê Başarane ra beşêk wina yo: ''Tecrîdê vera Birêz Ocalanî 15ê sibata 1999î ra nata dewam keno. Ganî cade peynîya tecrîdî bêra ardene û berê Îmraliyî bêrê akerdene. AKP-MHP nê prosesê peyênî de Birêz Ocalanî ser o wazeno tay manîpulasyonan bikero. Ma reyna vanê ke xeylêk vate û fikrê estê ke Birêz Ocalan komelî rê vajo. Coka ganî cade tecrîd bêro wedaritene û pêvînayîşî bêrê kerdene.

Polîtîkaya tecrîdî ya Îmraliyî zîndananê bînan de zî vila bîye. Nika zîndanan de 600ê ci giran 1600 tepişteyê nêweşî estê. Têna 2021 de 59 tepişteyê nêweşî zîndanan de merdî. Îqtîdar bi nê hawayî serba tepişteyanê nêweşan gamêke nêerzeno. Zîndanan de polîtîkaya mergî keno. Îqtîdar ganî zîndanan nêkero keyeyê mergî.

Ma nîqaş kenê ke vra hêrişanê serê zîndanan, şexsê Aysele Tugluk de vera metodanê îşkenceyî yê zîndanan ganî merdimî têkoşînêkê senînî bidê. Xebatê ma, paştdayîşê ma û xîretê ma do seba tepişteyan dewam bikerê.

Zîndanan de cinîyî seba le têkoşîn kenê yenê rehînkerdene, bi desan cezaya zîndanî dîyena înan, teber de zî qirkerdişê vera cinîyan dewam keno. Têna çeleyê 2022î de 26 cinîyî bi destê camêrdan kişîyayî. 28 cinîyan bi hawayêkê şikdarî dinyaya xo bedilnaye. Îqtîdar wa nê nêzdîbîyayîşî ra fek vera bido ke camêrdan teşwîqê qirkerdişî û cînsîperestîye keno.''