Hemvervatoxa HDKyî ya Anqara Emeke Başaraner derheqê fezleke û hêrişanê vera HDPyî de ANFyî rê qisey kerd.

Başaranere pare kerd ke fezlekeyî bêmana yê û vat: ''Yew heto huqûqî yê nê fezlekeyan çin o. Partîyê muxalefetî zî ney zanenê. Mîyanê fezlekeyan de zî na raştîye nuseno. Mîsal etîketê '8 Adare nêno muhakemekerdene' sey sûcêk dosyayan de ca gêno. Reyna îfadeyê 'terzê xîtabî yê dadîşahî' yê Leyla Guven sey sûcêk amebi qebulkerdene. Fezlekeyî zî wina bi ferasetêkê bêmanayî ameyî amadekerdene. Xora dewrê nê îqtîdarî de merdimî hînî pê naye şaş nêbenê.''

Başaranere da zanayene ke nê sûcdarîyî tengasîya îqtîdarî mojnenê û vat: ''Îqtîdar ne pê operasyonanê teberî ne zî pê nê kerdişan nêeşkeno bireso armancê xo. Çunke HDP verê nê rejîmî de asteng o. Coka wazeno meseleya HDPyî binî ra safî bikero. HDP akerde zî bimano girewte zî 6 mîlyon weçinîtoxê ci estê. Nê weçinîtoxî na cogarafya de weçinîtoxê tewr hîşyar, polîtîk û qerardar ê. Îqtîdar seba ke nê îradeyî werte ra wedaro şîdet xebitneno. Şîdet hetêkî ra kurmo polîtîk ê îqtîdarî yo la 6 mîlyon weçinîtoxanê HDPyî de zî kurmê xoverdayîşî yo polîtîk esto.''

Başaranere ard ziwan ke ê wazenê HDPyî reyde têkoşînêkê xurtî çin bikerê la ê do nê têkoşînê meşrûyî dewam bikerê û sey HDP paştî bidê HDP.