Şaristanê Baselî yê Swîsre de binpaykerdişê heqanê tepişteyanê sîyasîyan bi çalakîyêke ameyî protestokerdene. Xeylêk rêxistinê şorişgêrî bi wesîleya Hewteyê Heqanê Merdiman ê Dinya tewrê çalakîye bîyî û înan waşt ke tepişteyê sîyasîyî wa vera bidîyê.

Çalakîye de Hasan Sevîmî nameyê TSPyî ser o qisey kerd û bale ante îşkenceyanê dewleta tirke yê vera tepişteyanê sîyasîyan ê kurdan ser.  Dima eşkerayîya hempare ameye wendene û tede ame waştene ke dewleta tirke vera gerîlayan çekanê kîmyewîyan şuxiknena, Rojawan û Başûrê Kurdîstanî îşxal kena, Abdullah Ocalanî zî tecrîd kena û teda û îşkenceyê vera tepişteyanê sîyasîyan zî zêdînena. Çalakîye de ame îfadekerdene ke binpaykerdişê heqanê tepişteyan polîtîkayanê şerî yê dewleta tirke yê vera kurdan ra cîya nîyê.

Çalakîye pê sloganan qedîyaye.