18ê sibate de vera HDKyî operasyon ame kerdene, 54 kesî ameyî destbendkerdene. Înan ra 30 kesî ameyî tepiştene, 13 kesan rê cezaya hepsî ya keyeyî ameyî dayene û 7 kesî bi şertê kotntrolê edlîyî serbest ameyî veradayene.

Wekîlê EMEPî yê Îstanbulî Îskender Bayhanî ard ziwan ke bi operasyonê vera HDKyî yeno waştene ke şar bêro tersnayene û vat ganî vera nê têkoşîno komelkî dahîna bêro xurtkerdene.

Îskender Bahanî bale ante serê qeyûman ke têdima ameyî, zextê vera têkoşînê sendîkayan,operasyonê vera HDKyî ser û nê vatî: ''Îqtîdar keno ke bi hêrişan payra bimano la çend şino hêzê xo vînî keno. Îqtîdar hem wazeno tengayîya ke tede yo tira vejîyo hem zî verê muxalefetê karker, kedkar û şarî ke çend şino girdêr beno, bigîro. Nê hêrişan ra yeno famkerdene ke rojanê verê ma de do dahîna zaf operasyonî bêrê kerdene. Vera operasyonan cewabo tewr gird o yo ke têkoşîno komelkî bêro xurtkerdene.

Îqtîdarî bi hêrişê vera HDKyî hêna mojna ra ke hêzê şarî ra terseno. Semedê Îtîfaq û yewbîyayîşanê ke vera ci yenê ronayene qerqiliyeno. Îqtîdaro ke goreyê hewcedarîyanê xo Serdozgerîya Komere ya Îstanbulî sey çuyeyî şuxulneno wazeno operasyonanê winayênan bizêdîno. Dewrê kilmî de Tirkîya bi dewaya Gezî, dewaya Kobanê rî bi rî mend û nika newera eşkera sîyasetê kûmpasî dewam keno. Ma mecburê ke vera nê bi xurtkerdişê têkoşînê kede, haştîye û demokrasîyî cewab bidê.''