Polîsanê almanan 27ê nîsane de eştibi Merkezê Komelê Demokratîkî yê Kurdan ê Bremenî (NCDK) ser. Sereştişî ser o bi nuştekî agahdarîye nêameye kerdene. Cigêrayîşî 6 saetan dewam kerd. 

Wekîlê Partîya Çepe Muhlîs Kocaagayî sereştişê polîsan ê vera Merkezê Komelê Demokratîkî yê Bremenî vist rojdemê parlamentoyî. Kocaagayî derheqê babete de ajansê ma rê qisey kerd.

Kocaagayî pare kerd ke ey reya verêne sereştişêko winayên dîyo û vat: ‘’Sebebê sereştişî nêame eşkerakerdene. Ma xîret kerd ke xo biresnê Wezîrîya Karanê Zereyî û Wezîrîya Karanê Zereyî ya Bremenî ke agahîyan bigêrê. Ma eşnawit ke dest nîyayo malzemeyan û telefonan ser. No nêzdîbîyayîş krîmînalîzekerdiş o û nêno qebulkerdene. Ma vernîyazêk da Wezîrîye û cewabî pawenê. Qet nêbo ma cewabê persanê ‘Çira polîsan eşto merkezî ser, çi visto destî’ bigêrê.’’

Kocaagayî da zanayene ke Almanya de qedexekerdişê PKKyî ra nata kurdî yenê krîmînalîzekerdene û vat: ‘’ Xîret yeno kerdene ke kurdî bêrê krîmînalîzekerdene, verê komele û rêxistinîya kurdan bigêrîyo. Komeleyê kurdan goreyê qanûnanê Almanya yenê awankerdene. La bi nê têgêrayîşanê xo dewleta Almanya nînan krîmînalîze kena.

Ma hêverî şayîya Newroze Parlamentoyê Bremenî de kerdibî. Bi nê xîretan ma kenê ke bimojnê ke kurdî parçeyê nê komelî yê û heqanê xo yê demokratîkan şuxilnenê.’’