Hemserekê Konseya Rayberdişî ya KCKyî Cemîl Bayikî beşê peyênî yê roportajê xo yê taybetî yê ANFyî de qala konseptê şerê yê dewleta tirke yê vera şarê kurdî û hemkarîya PDKyî kerd û bale ante xoverdayîşê gerîlayan ser ke heme hêrişê dişmenî betal kerdî.  Qiseykerdişê Bayikî ra qismêk wina yo:

''Ma çewras serrî yo vera dewleta tirke ya qirkere şer kenê. Netîceyê nê têkoşînî werte de yê. Dewleta tirke derbe girewte û Şorişê Azadîye yê Kurdîstanî çend şino gird beno. Têgêrayîşê ma ewro bi paradîgmaya xo şorişê Rojhelatê Mîyanînî rê serkêşîye keno tesîrê dinya keno. 2024 de têkoşîno tarîxî yê gerîlayan girdêr bi û hetê bînî ra Hemleya Azadîye her hetê dinya ra vila bîye û tesîrê xo ramojna.

Sere de ganî no bêro zanayene paştdayîşê PDKyî ra nêbo Tirkîya dest nê îşxalî nêkerêdene. Îqtîdarê faşîstî yê  AKP-MHPyî 24ê temmûza 2024î de konseptê çokdayîşî fîna dewre ke kurdan qir bikero. Dewleta tirke sere de NATO xeylê hezan ra paştî girewte û reyna xeta îxanetî zî girewt cayê xo.

Payîzê 2023yî ra nata gerîlayan înîsîyatîf girewte û derbeyê girdî dayî dewleta tirke ro û nê prosesî 2024 de zî dewam kerd. No înîsîyatîf koyan ra kirişîya bajaran û bi çalakîya Tusaşî resa titîkî. Îqtîdaro faşîst hende bin kewt ke Develet Bahçeliyî bi fekê xo vat ê bêçare mendî û Rayber Apoyî ra çareserîye waşte.

Zap, Metîna, Avaşîn û Xakurkê de gerîlayî têkoşînê tewr girdî yê tarîxî danê. Ez heme hemrayanê ma ke nê têkoşînî de şehîd bîyî, bu hurmet yad kena. Heme şervanan û fermandaranê ke YJA Star û HPGyî ke tunelanê şerî û mewzîyan xover danê selam kena. Gerîlayî bi taktîkê erazî û tunelanê şerî çalakîyanê serkewteyan kenê. Dişmen vera nê taktîkê şerî bêçare mendo.

Rixmê heme teknîkî, hêzê hewayî, bombardumananê giranan, çekenê qedexeyan nêeşkeno têkoşînê gerîlayan bişikno. Înîsîyatîfê şerî destê gerîlayan de yo. Eke PDK paştî medo, artêşa tirke nêeşkena 24 saete tîya de bimano.  Bi paştdayîşê PDKyî cayanê ke tede yê, eşkenê ûca bimanê. Dewleta tirke bi vatişê 'ma kilit qefilna' wazena binkewtişê xo binimno. Kilîdê koyan destê gerîlayan de yo.

Ma serrêka têkoşînî ya muhîm û zehmete xo dima verdaye. Hem têkoşîno tarîxî yê gerîlyan hem zî têkoşînê şarê ma û averşîyayîşê Hemleya Azadîye ya Globale 2024 de netîceyê muhîmî vetê werte. Netîceyo tewr pîl badê çar serran ma Rayber Apoyî ra xebere girewte. Selamanê Rayber Apoyî ma zaf kerdî şa û hêz û moral da ma.

Ma sey têgêrayîş û şarî her wextî ra zafêr rêxistinkerde û hêzdar ê. Ma serkewtişî rê her wextî ra zafêr nizdî yê. Verê ma de tehlukeyî est ê la ma bi têkoşînê xo yê rêxistinkerdeyî  eşkenê heme zorî xo dima biverdê. Ma têkoşînê dewaya heqedarî danê. Ma semedê ziwan, nasname , kultur û azadîya xo têkoşîn kenê. Ma nê semedî ra bi des hezaran şehîdî dayî. Qet çîyêk nêeşkeno ma têkoşînê ma yê heqdarî ra raqilno. Ma qerardar ê ke têkoşînê xo xurtêr bikerê û serra 2025î bikerê serra serkewtişî. Na çarçewa de ez serra newî pîroz kena, serkewtiş wazena.''