Hemserekê Konseya Rayberdişî ya KCK’yî Cemîl Bayikî xoverdayoxanê grevê vêşanîye yê ke seba wedartişê tecrîdê serê Rayberê Şarê Kurdî Abdullah Ocalanî kewtê grevê vêşanîye rê mesajêko bi vîdeo şirawit.

Bayikî ard ziwan ke bi slogana ‘Ma do tecrîdî bişiknê, faşîzmî birijnê û Kurdistanî azad bikerê’ çalakîyêka tarîxîye amîya destpêkerdene.

Bayikî vat xoverdayîşê grevê vêşanîye roje bi roje hîna beno xurt û nê vatî: “Çalakwanî vanê heta ke ê biresê amacê xo ê do çalakîya xo bidomnê. Verê hemine embaze Leyla Guvene dest bi na çalakîye kerde. Hemverê polîtîkaya tecrîdê serê Rayber Apoyî de tewirêk ramot. Çalakîya embaze Leyla Guvene zîndananê Kurdistan û Tirkîya de û bajaranê Ewropa de veng da.”

Bayikî qiseykerdişê xo wina domna: “ Nasir Yagiz, Şiyar Xelîl, Huseyîn Yildiz, Îlhan Şîş, Yûsûf Îba, Mûstafa Tûzak, tepişteyê ke zîndananê Kurdistan û Tirkîya de yê, çalakwanê ke Strasboûrg, Silêmanî, Hewlêr, Mexmûr, Şengal û Rojava de yê, ez heme çalakwanan silam kena.

Şima tena seba şarê Kurdî nê heman wextî de seba merdimîye zî xover danê û yew destanî nûsenê. Na çalakîya ke embaze Leyla Guvene daya destpêkerdene, roje bi roje xurt bena. Rastîya dewleta qirkerdoxe ya ke estbîyayîşê xo serê qirkerdişê Kurdan de awan kerdo, reyna xo ramojnena. Şarê ma hîna rind vîneno ke dewleta Tirkî kena ke Kurdan qir bikero û hemverê nê qirkerdişî bi hawayêkê hîna xurtî wayîrê xoverdayîşî vejêna.

Çalakîya ma çende şino her wareyî de hîna rind yena famkerdene, rixmê na rastîya dewleta Tirkî ya faşîst û kolonyalîste de zî na hîna rind yena dîyene. No zî nerazîbîyayîşê hemverê îqtîdarê faşîstî ramojneno. Xoverdayîşê grevê vêşanîye her roja ke şina mucadeleyê azadî û demokrasî yê şarê Kurdî meşrû û heqdar bîyayîşê xo hîna zaf ramojneno. No zî beno sebeb ke dostê Kurdan kîşta înan de cayê xo bigîrê.”

ÎQTÎDARÊ AKP-MHP’YÎ DEST BI KAYAN KERDO

“Îqtîdarê AKP-MHP’yî û dewleta Tirkî her roja ke şina hîna zaf teşhîr benê û kewenê halêkê zorî mîyan. Seba ke xo nê ra xilas bikero bi kayan muracatê kayanê ke pê ma ancî bixapênê kenê. Nika zî kayêk yeno kaykerdene û wazenê ke ci ra netîce bigîrê. Ganî AKP-MHP û dewleta Tirkî rind bizano hendî kayê bi nê tewirî netîceyêk nêgênê.

Ê nêeşkenê nê kayan ra netîceyêk bigîrê, naye ra ganî waştişanê Leyla Guvene û xoverdayoxanê grevê vêşanîye qebûl bikerê, Rayber Apoyî û çalakwanan dir ronişê.”

Bayikî veng da ke kam ça beno wa bibo wa sere wedaro û hurzo lingan ser û vat: “Prosesê komploya serê Rayberîya ma de şar senî werişt serê lingan, sere wedart, xover da û şehîdî dayî, ganî heman ruh û xoverdayîşî xo rê esas bigîrê. A game do çalakîyî biresê netîce.”