Goreyê eşkerayîya Buroyê Çapemenîye yê DEM Partî ekonomîst-ceribnayox Yann Moulier-Boutang o ke wextêk Parîs de temsîlkaranê têgêrayîşê otonomi bi û Profesor Donna Haraway ya amerîkayijî semedê paştdayîşê vengdayîşê Rayber Apo mesaj şawit.

Mesajê Moulier-Boutangî wina yo:

“Sey entelektuelanê bînan ê ewropayijan ez zî têkoşînê haştîye yê DEM Partî bi keyfweşî verwazî kena. No têkoşîn, vengdayîşê rayberê PKKyî yê qedînayîşê têkoşînê çekdarî û feskerdişê partîya xo, semedê demokratîkbîyayîşê Tirkîya û caardişê heqê seyyewbînîye hemwelatîye yê kurdan firsetêk o. 

Pêro averşîyayîşê Tirkîya hemwelatîyanê Yewîya Ewropa eleqedar kenê. Tirkîya serra 1987 muracatê Yewîya Ewropa kerd û 1999 de sey namzeda fermî ameye qebulkerdene. Şertê prosesê namzedîye zî yê esasî demokrasî, dewleta huqûqî, heqanê merdiman rê hurmet û rewşa kurdan ca genê. Serranê 2013-2014 de zextê vera kurdan biney bîyî kêm la tewirê otorîterî yê îqdîdarî no proses qelda ro.

Konjonkture mîyanneteweyîyî bedilyeno. Nê averşîyayîşî semedê kurdan ke Iraq, Sûrîye û Îran de yê beno ke bibo despêkerdişê dewrêkê neweyî. Ewro gerek ma paştî bidê înşakerdişê demokrasîyî yê semedê bindestan ê Rojhelatê Mîyanênî. Gerek polîtîkaya Yewîya Ewropa ya Rojhelatê Mîyanênî zî goreyê îlkeyanê ci bo.”

Mesajê ademîyena femînîste Donna Haraway ya amerîkayije zî wina yo:“Ez prosesê haştîye yê Tirkîya de paştî dana şarê kurdî û temsîlkaranê ci. Haştîya bianore û raşte hinî mumkun a. Bi hêvî û paştîdayîşî…”