Hêzanê Îsraîlî dima ke fuzeyê Îranî yê ke erzîyayê tesbît kerdî bi hawayêkê demkî alarmê hewayî da. Selahîyetdarêkê leşkerîyî da zanayene ke Îranî ra nêzdîyê 10 fuzeyê balîstîkî erzîyayê û zafê nînan ameyê astengkerdene.

Goreyê televîzyonê dewlete yê Îranî Muhafizanê Şorişî pare kerd ke fuzeyê balîstîkî yê hîpersonîkî ameyê eştene. Îsraîlî dîyar kerd ke înan zî serê sibayî hêrişê Tehranî kerdo.

Îranî heta nika qasê 400 fuzeyî eştê Îsraîlî la zafê nînan tena bîyî sebebê zerarê madîyî û birîndarbîyayîşî.

Rêxistina Heqanê Merdiman a Îranî HRANA îdîa kerd ke destpêkî ra nara Îran de Îsraîlî 585 kesî kiştê û 239ê nînan sivîl ê. Hûmara birîndaran zî 1326 kes ê.

Serekwezîrê Îsraîlî Bunyamîn Netanyahuyî roja sêşemeyî îdîa kerdibi ke kiştişê Hamaneyî do peynîya şerî bîyaro. 

Hamaneyî zî Xî ser o vat ke ‘’Ganî ma şîdetî vera rejîmê terorî yê sîyonîstî wurzê we. Ma do sîyonîston rê rehme nêkerê.’’

Serekê Amerîka Donald Trumpî derheqê şerê Îsraîl û Îranî de Konseya Asayîşê Neteweyî arê daye. Selahîyetdaranê Amerîka pare kerd ke Trump pêro alternatîfan ercneno û Washington narey tewra hêrişê Îsraîlî nêbîya.

Amerîka da zanayene ke ê do sîstemê pawitişî yê Rojhelatê Mîyanênî hîna xurt bikerê.

New York Timesî ard ziwan ke Trump beno ke teyarayanê sotemenîye bişawo  ke teyarayê şerî yê Îsraîlî biaresê.