Serekê Rûmetî yê HDPyî Ertugrul Kurkçuyî nîqaşê serê Qanûnê Bingeyîyî yê Tirkîya ajansê ma rê ercnayî.

Kurkçuyî ard ziwan ke sebebê çin o ke kurd, demokrat, sosyalîst û merdimê bindestî û temsîlkarê şaran seba ‘Qanûnê Bingeyî’ qerqilîyê û dîyar kerd ke mîyanê hemsengîya nikayêne ya polîtîke de xeyalo winayên yeno manaya xoxapînayîşî.

Kurkçuyî îfade kerd ke Meclîs bê vurnayîşê Qanûnê Bingeyîyî eşkeno qanûnan vejo, xeylê meseleyan çareser bikero û vat: ‘’Pêro îhtîmalê serê ameyoxê Tirkîya û Kurdîstanî eşkenê bêrê nîqaşkerdene û rojdemo komelkî bêro zelalkerdene. Eke karê ke eşkenê cade bêrê kerdene nênê kerdene azadîya tepişteyanê nêweşan zî tede seba sereraştkerdiş û holkerdişî game nêna eştene, o çax pêşnîyazê ‘Qanûnê Bingeyî yê Sivîlî’  yeno a mana ke wayîrê nê pêşnîyazî nîyethol nîyê.

Eke şima raşta zî wazenê Qanûnê Bingeyî yê Sivîlî virazê ganî hêverî verê xo bidê Konseya Ewropa, sozanê xo bîyarê ca. Nê sozî vurnayîşê qanûnî yê seba azadîya fikran û rêxistinîye, sereraştkerdişê qanûnê tepişteyan û caardişê heqanê kurdan ê kulturelan ê. Hêverî biranê Mehkemeya Qanûnê Bingeyî ya Ewropa bîyarê ca.

Na çarçewe de zehmet nîyo ke bêro famkerdene ke qey pêşnîyazê ‘Peymana Komelkîye’ ya ke Ocalanî seba çareserîya meseleya kurdan pêşkêş kerda û pêşnîyazê vurnayîşê Qanûnê Bingeyî peygoş yenê kerdene. Seke mi vat Meclîs de bi armancanê cîyayan ‘Komîsyon’ bêro awankerdene zî ez bawer a ke wekîlê ma nê komîsyonî de waştişê şaran do bîyarê rojdemî û astengîyanê vera azadîya îfadeyan parçe bikerê.’’