Serekanê baroyan ê Semsûr, Agirî, Êlih, Çewlîg, Bedlîs, Dêrsim, Amed, Colemêrg, Îdir, Qers, Mûş, Sêrt, Riha, Şirnex û Wanî meclîs de Hemserekê Pêroyî yê DEM Partî Tuncer Bakirhan zîyaret kerd. Hetkarê Hemserekanê Pêroyîyan Ozturk Turkdogan, serekwekîlê grûbe Gulistane Kiliç Koçyîgît û Sezaî Temellî û wekîlî zî tewrê zîyaretî bîyî.

Pêvînayîş de averşîyayîşê Prosesê Haştîye û Komelê Demokratîkî ameyî destgirewtene û fîkîrî ameyî parekerdene. Pêvînayîş de baroyan dosyaya ke derehqê prosesî de kerda hezi, teslîmê Bakirhanî kerd. Tuncer Bakirhanî serekanê baroyan rê semedê zîyaretî înan spas kerd û vat; no proses prosesê bi rayîrê muzakere û demokrasîyî çarserkerdişê meseleya kurdan o.

Tuncer Bakirhanî ard ziwan ke averşîyayîşê Rojhelatê Mîyanênî û Tirkîya her kesî semedê çarserîye mecbûr keno û nê vatî: “ No proses prosese qedînayîşê şer û pêkewtişanê 50 serran, bi rayîrê müzakere û demokrasîyî çarserkerdişê meseleya kurdan o. Kam ke nê prosesî bi prosesê haştîye tacîdar mekero, do vînî bikero. Welato ke demokratîk nîyo problemê ci tewr zaf huqûqî eleqedar kenê. Coka barê şima giran o. 

Vengdayîşê Bahçelîyî, vengdayîşo tarîxî yê Abdullah Ocalanî û cewabo pozîtîf ê rêxistine ma zaf hêvîdar kerdî. Ma sey DEM Partî sereyê ci ra paştî danê nê prosesî. Çar hetanê Tirkîya de derheqê prosesî de kombîyayîşê ma devam kenê.”

Tuncer Bakirhanî semedê vernîyaz û raporanê înan serekanê baroyan rê spas kerd û vat ê do raporanê înan xebatanê xo de bierjnê.