Sekretera Pêroyî ya BastA Fransizka Stier dîyar kerd ke vengdayîşê Rayber Apoyî yê 27ê Sibate vera şerê nikayênî seba dinya ‘’îmkanêko tarîxî’’ yo û vat: ‘’Ganî Ocalan bi hawayêkê zelalî qisey bikero.’’
Partîya Swîsre BastA paştî dana kampanyaya ‘Ez Wazena Abdullah Ocalanî Zîyaret Bikera’ ke hetê Forumê Azadîye û Haştîye ya Ewropa (EFFP) ra dîyabî destpêkerdene.
Sekretera Pêroyî ya BastA Fransizka Stier nameyê partîya xo Wezîrê Edaletî yê Tirkîya Yilmaz Tunçî mektubêka fermîye şawite û waşt ke Rayber Apoyî de pêvînayîş bikera.
Fransizka derheqê babete de keyepelê EFFPyî rê roportajêk da. Fransizka Stier dîyar kerd ke vengdayîşê Rayber Apoyî yê 27ê Sibate vera şerê nikayênî seba dinya ‘’îmkanêko tarîxî’’ yo. Fransizka da zanayene ke ê seba xîretanê haştîye yê Rayber Apoyî paştî danê kampanya.
Fransizka ard ziwan ke ganî cinîyî prosesê haştîye de rolêkê aktîfî kay bikerê. Aye ferasetê Konfederalîzmê Demokratîkî yê Rayber Apoyî sey ‘’modelê çareserîye yê globalî’’ pênase kerd û vat: ‘’Proseso ke nika dewam keno zaf hesas o. Ganî bawerîye newe ra bêra awankerdene û Ocalan nê prosesî de bieşko bi rehetî qisey bikero. Ganî Ocalan bibo parçeyêkê nê prosesî û bi hawayêkê azadî bieşko qisey bikero. Ganî dezgeh, partî û rêxistinê Ewropa zî nê prosesî de hîna zaf mesuldarîye bigêrê xo ser.’’
