Hemserekê Konseya Rayberdişî ya KCKyî Cemîl Bayikî derheqê Vengdayîşê ‘Haştîye û Komelê Demokratîkî’ yê Rayber Apoyî de ANFyî rê tayê ercnayîşî kerdî.

Qismê roportajê Bayikî yê diyînî ra tayê noqtayê girîngî wina yê:

‘’Rayber Apo bi xo temînatê prosesê haştîye yo. Sey Rayber Apoyî dewleta tirke û îqtîdar zî ganî erk û mesuldarîyanê xo bîyarê ca. Xora ma zanenê ke şarê kurdî bi têkoşînêkê pîlî resa nê rojan. Polîtîkaya înkar û îmha ya dewleta tirke bin kewte. 

Rayber Apoyî mîyanê nê şorişî de şorişêk awan kerd. Ey tim newebîyayîş û xovurnayîş kerd esas. Heta nika hêriş û komployanê vera şarê ma û têgêrayîşî netîce nêdaye. Eke dewlete polîtîkaya înkar û îmha de israr bikera do birejîya. Ne Rayber Apo, ne ma ne şarê kurdî ne zî şarê Tirkîya do çîyêko winayên nêwazo.

Eke şertê xebate yê Rayber Apoyî nêrê awankerdene û o bi azadî nêeşko bixebito no proses do aver nêşoro. Seba ney dewlete ganî qanûnan viraza. Şarê kurdî ney wazeno. Tena kurdî ney dormeyê sosyalîst û demokratî zî ney wazenê. 

Xora Rayber Apoyî rê veng dîyabi ke wa bêro Meclîs de qisey bikero. Dewlete peynî de şîye verê Rayber Apoyî. La hetê bînî ra yew ziwanê nefretî zî est o. Vanê ‘PKK teslîm bîyo. Ma ser kewtî.’ Na propagandaya zûrayîne seba nimnayîşê qelsîye ya. 

Rayber Apoyî venga PKKyî da. Komîteya Merkezî ya PKKyî zî cewab da nê vengdayîşî. Komîte vat ‘Ma wazenê vengdayîşê Rayber Apoyî bîyarê ca. La ganî şertê xebate yê Rayber Apoyî bêrê azadkerdene û weşkerdene. Ganî Rayber Apo kongre bîyaro pêser, îdare bikero û rayîrî bimojno ci. Eke kongre bêra pêser, rewşa têkoşînê çekdarî û PKKyî do bêra nîqaşkerdene.’

Komîte zî vat ke heta ke hêrişî est bê, teyara û helîkopterî asmênê ma ser a bigêrê kongre do nêra pêser. HPGyî zî vat ke ganî dewleta tirke adirbirnayîşî îlan bikera. La dewlete atmosferê ‘Ma ser kewtî, qey ma adirbirnayîşî îlan bikerê?’ afernena. 

Ganî şertê adirbirnayîşî bêrê awankerdene. O çax kongre do bieşka bêra yewca. Ganî Rayber Apo bi xo kongre bîyaro pêser. Ey ra ber çew nêeşkeno ney bikero û qeraran bigêro. Çunke ronayoxê na partîye Rayber Apo yo.

Çareserîya meseleya kurdan, demokratîkbîyayîşê Tirkîya û Rojhelatê Mîyanênî tena meseleya ma û Rayber Apoyî nîya. Meseleya her kesî ya. Ganî hêzê mîyanneteweyîyî bi eşkerayîyan nêmanê û raşta raşte nê prosesî de mesuldarîye bigêrê xo ser.

Rayber Apoyî bi paradîgmaya komelê demokratîkî û haştîye wazeno ke şaran biresno serkewtişî. Nê têgêrayîşê ma tarîxê xo de tim xo vurna, newe kerd û verê qewimîyayîşan akerd. Hinî no têgêrayîşê azadîye resayo a asta ke yew partîye ra pîlêr o. 

Seke Rayber Apoyî pawitişnameyanê xo de vatibi wextê şaran ho dest pêkeno. Ganî cinî û ciwanî serkêşîya awankerdişê komelê demokratîkî bikerê. Ganî komelê Tirkîya zî xo rêxistin bikero, nê prosesî îdare bikero. Ganî dormeyê sosyalîst û demokratîkî bi xurtî paştî bidê nê prosesî. Cepheyê kurdan ganî yew bibo.

Rayber Apoyî vurîyayîş, xovurnayîş û neweraawanbîyayîş dayî destpêkerdene. Rayber Apoyî rixmê hêriş û komployan nê qewimîyayîşî kerdî. Ganî Rayber Apo û paradîgmaya ci zî hol bêro famkerdene.

Komel nê bingeyî ser o ganî têbigêro. Hetê bînî ra ganî Hemleya Azadîye ya Globale zî bêra caardene û pîlkerdene. Ganî Rayber Apo Zîndanê Îmraliyî ra bêro vetene û azadkerdene. Ganî o sîstem bêro tasfîyekerdene. Hedefê ma no yo ke ma Rayber Apoyî azad bikerê û şertanê xebitîyayîşê azadî awan bikerê. Ganî her kes nê hedefî ser o erk û mesuldarîyanê xo bîyaro ca.

Nê esasî ser o ez Roşanê Newroze û Roşanê Remezanî pêro şarê ma rê fîraz kena. Ez her kesî rê serkewtiş wazena.’’