Hemserekê Konseya Rayberdişî ya KCKyî Cemîl Bayikî vengdayîşê ‘Haştîye û Komelê Demokratîkî’ yê Rayber Apoyî û qewimîyayîşê peyê ci ajansê ma rê qisey kerd.

Qiseykerdişê Bayikî ra tayê noqtayê girîngî wina yê:

‘’Rayber Apoyî manîfestoyê seserra 21ine weşana. Ganî cewherê nê manîfestoyî hol bêro famkerdene. Rayber Apoyî çareserîya meseleya kurdan verê her kesî de naye ro. Rayber Apoyî bi nê manîfestoyî da famkerdene ke sosyalîzmo reel rijîyayo. Rayber Apo nika xîret keno ke tesîranê sosyalîzmê reelî werte ra wedarno.

Têkilîya mabênê kurd û tirkan ronîyayîşê Komara Tirkîya ra dima xeripîyaye. Komara Tirkîya ya ke dewleta neteweyî ya, kurdan rê qirkerdiş ferz kerd. Dewleta tirke tim kurdî bi ‘parekerdişî-vilakerdişî’ sûcdar kerdî. La dewleta tirke kurdan rê îxanet kerd, kurdan nêkerd. Rayber Apo wazeno ke newe ra îtîfaqê kurdan û tirkan awan bikero. Seba nê îtîfaqî zî ganî dewlete polîtîkaya înkar û îmha ra fek vera bida. Yanî bi komelê demokratîkî no îtîfaq mumkîn o. 

Seba ke çareserîya meseleya kurdan de rayîrî girewte bîyê Rayber Apoyî têkoşîno çekdar dabi destpêkerdene. Têkoşînê çekdarî ra ber rayîrêk nêmendibi ke kurdî xo îfade bikerê. Nê têkoşînê çekdarî armanc kerdêne ke kurdan rê rayîrê sîyasetî awan bikero û kerd. No têkoşîno çekdar coka meşrû bi.

Verê cû zî çend reyî Rayber Apoyî adirbirnayîş îlan kerdibi. Wextê Turgut Ozalî de, wextê Erbakanî yê 93-98î de. La bi Komployê Mîyanneteweyîyî cewab dîya nê xîretanê adirbinayîşî. Rayber Apoyî Zîndanê Îmraliyî de zî 2003, 2005, 2009 û 2013 de xîretanê xo yê adirbirnayîşî rê dewam kerd. La nê xîretî zî raştê sabotekerdişî ameyî.

Tasfîyeya PKKyî nişka ra nêbîye rojdem. 1993 ra nata rojdemêko winayên estibi. Çunke PKKyî rolê xo qedîna. Têgêrayîşêkê şarî yo pîl vejîya werte. Paradîgma, felsefe, îdeolojî de vurîyayîşêk çin o. La metodê rêxistinîye û têkoşînî ganî bivurîyê.

Rayber Apoyî pêro rewşî ercnayî û vengdayîşê Haştîye û Komelê Demokratîkî kerd. Rayber Apoyî verê Tirkîya de zî tayê tercîhî nayî ro; eke Tirkîya wazena demokratîk biba ganî înkar û îmha ra fek vera bida û seba çareserîya meseleya kurdan game bierza.

Rojhelatê Mîyanênî de vurîyayîşê pîlî qewimîyenê. Nê prosesî de kam destekê kurdan bigêro o do ser bikewo. Eke Tirkîya wazena ser bikewa ganî demokratîk biba yanî meseleya kurdan çareser bikera. Serkewtişê Tirkîya pabesteyê gamanê ci yo. Rayber Apoyî gamêke eşte. Hinî dora gameştişî Tirkîya de ya. Şarê kurdî nê têkoşînî de bedelê pîlî dayî û netîceyê pîlî zî vistî destî. Rayber Apo wazeno ke destkewteyanê kurdan aver bero. Yanî ‘têkoşînî ra fekverdayîş’ çin o. 

Hinî çew nêeşkeno bê Rayber Apoyî û kurdan sîyaset bikero. Rayber Apoyî bi samîmîyetê xo destekê her kesî girewt. Ganî ma vengdayîşê Rayber Apoyî hol fam bikerê. 

Rayber Apo wazeno ke nê firsendê tarîxîyî seba şarê kurdî, şarê tirkî û pêro merdimatîye bişuxilno. Rayber Apo do seba şarê kurdî û Kurdîstanî mesuldarîyanê xo bîyaro ca.

Propagandaya dişmenanê Apogîran û têgêrayîşî ya sey ‘PKK bi feshkerdişê xo destkewteyanê kurdan visneno binê tehlukeyî’ pûç a. Çew nêeşkeno wina têkoşînê PKK û Rayber Apoyî biherimno. Rayber Apoyî û PKKyî şarê ma û îdeolojîya xo ra hêz girewt. Çew nêeşkeno na raştîye biherimno.’’