Sekreterê Pêroyî yê Lombardiya yê Sendîkaya Karkeranê Perwerdeyî ya Îtalya  (FLC CGIL) Massimiliano De Conca derheqê Vengdayîşê Haştîye û Komelê Demokratîkî yê Rayber Apoyî û qewimîyayîşanê peyê ci de ajansê ma rê qisey kerd.

De Conca îfade kerd  ke feshkerdişê PKKyî peynî nîyo destpêkêko newe yo û vat: ‘’Krîter û birê Kongreya 12ine ya PKKyî îstîsnayî yê. Nê peynî nîyê, destpêk ê. Fikrê Abdullah Ocalanî bi xo wayîrê ê hezî yê ke eşkenê şeranê dinya biqedînê. Vengdayîşê Ocalanî nîşaneya vurîyayîşêkê pîlî yo. Şarê kurdî eşkeno bibo modelêkê polîtîkaya komelkîye.’’

De Conca ard ziwan ke seba serkewtişê prosesî mesuldarîyêka pîle kewena milê komelê mîyanneteweyîyî û vat: ‘’PKK bi mesuldarîyêka pîle têgêra. Ganî dewleta tirke bire bida. Ya a do verê xo bida demokrasîyî yan zî rejîmê nikayênî biweçîna. Ganî komelo mîyanneteweyî zî hûrmetê krîteranê mîyanneteweyîyan bikero.. Ganî dewleta tirke goreyê krîteranê mîyanneteweyîyan têbigêra. Eşkerayîyê PKKyî yan zî ê Ocalanî seba vurîyayîşî qîm nêkenê. Ganî paştî bêra dayene prosesî. Seba serkewtişê prosesî ganî gamê sîyasî û huqûqî hetê dewleta tirke ra bierzîyê. Hêverî ganî Abdullah Ocalan azad bibo.’’

De Concayî bale ante girîngîya fikranê Rayber Apoyî ser û vat: ‘’Heta ke sînorê sîyasî û neteweyî est bê şer zî do est bo. Tîya de fikrê Konfederalîzmê Demokratîkî yê Ocalanî girîng o. Ocalan girîngîye dano cinî û ciwanan ser zî. Nê fikrê Ocalanî –Konfederalîzmo demokratîk û komelê cinî û ciwanan- fikrê şorişgêrî yê.

Ganî cigêrayoxî fikrê Ocalanî ser o vinderê. Fikrê ey tena meseleya kurdan eleqedar nêkenê. Ewro meseleya bingeyîne meseleya demokrasîyî ya. Ganî çareserîya newîye bêra dîyene ke na çareserîye mîyanê fikranê Ocalanî de ya.’’