Hemserekê Konseya Rayberdişî ya KCKyî Cemil Bayikî bi wesîleya serrgêra Komployê Mîyanneteweyîyî yê vera Rayberê Şarê Kurdî Abdullah Ocalanî yo ke 9ê teşrîna verên a 1998î de dest pêkerd, ANFyî rê erjnayîşî kerdî. Beşê verênî yê roportajê Cemil Bayikî ra qismêk wina yo:

''Komployê Mîyanneteweyîyî şexê Rayber Apoyî de vera şarê kurdî, şarê Rojhelatê Mîyanênî û merdimîye yeno rayraberdene. Komployî 26 serrî xo dima verdayî. Rayber Apo vera komployî têkoşînêkê tarîxîyî rayra berno. Bi na wesîle ez Rayber Apoyî rê selam û hurmetanê xo şawena û sozê ke ma dayo ey ez newe kena.

Eke ewro komplo bi tecrîdî dewam keno, ganî ma sebebê nê hol fam bikerê. Ganî ma nizdîbîyayîşê sîstemê modernîteya kapîtalîste, sîstemê îşxalkeran, sîstemê dewletan û îqtîdarn hol fam bikerê. Eke ma nê fam mekerê ma nêeşkenê komplo û tecrîdî fam bikerê. Bingeyê nê kombîyayîşê Kahîre de ame hazirkerdene. Nê kombîyayîşî de Rojhelatê Mîyanênî ame parçekerdene. Hem erebî hem kurdî ameyî parçekerdene. Nê parçekerdişî ser o sîstemê modernîteya demokratîke nişna ro. Bi nê parçekerdişî înan kurdî înkar kerdî. Coka sîyasetê qirkerdiş, îmha ame esasgirewtene.  O tarîxî ra nata sîyasetê qirkerdişî yeno rayraberdene. Dewleta tirke nika qanûnanê xo sey qanûnanê qirkerdişê vera kurdan vejena.

Sîstemê Îmraliyî meşrû nîyo. 26 serrî yo Îmrali de qanûnê Galdioyî yenê caardene. Ûca de qet huqûqêk çîn o. Çunke semedê şarê kurdî heq, huqûq çîn o. Coka têkoşînê Rayber Apoyî û PKKyî vera xo vînenê, sûcdar kenê. Coka Rayber Apo û PKKyî rê dişmenîye kenê. Rayber Apo Îmrali de şertanê zehmetan de, mîyanê bêîmkanîye de  vera nê sîstemî vejîya, têkoşîno tarîxî rayra berd. Erjê kurdan, erjê merdimîye temsîl kerdî. Nê semedî ra xo kerd hêzê çareserîye. No semedê şarê kurdî, şarê Rojhelatê Mîyanênî û semedê merdimîye kerd. Rayber Apoyî ra tersenê coka komplo kerd û bi tecrîdî domnenê.

Têkoşînê Rayber Apoyî yê Îmraliyî hem raştîye kurdan vet meydan hem zî xeta îxanet û hemkarîye û xeta welatperwerîye û şorişî zelal vetî meydan û her kesî nê wird xetî fam kerdî. Coka mîyanê kurdan de raştîya keyeyê Barzanî ameye famkerdene. No semedê şarê kurdî destfînayîşo zaf pîl o. Çunke şarê kurdî heta nika vatêne qey no keye semedê kurdan têkoşîn keno. La vejîya werte ke no keye têna menfeatê xo esas geno. Coka kiştê dişmenanê kurdan de vindeno û vera kurdan vejîyeno.  Rayberîye têna raştîye kurdanê xayînan nêvet werte eynî wextî de ê kesê ke xo sey demokrat, roşnvîr, sosyalîstî ramojnenê raştîya înan zî vet meydan. Reyna dost û dişmenê kurdan zî safî kerdî. Nê têkoşînî de hem  Rayber Apo, hem şarê kurdî û hem zî PKKyî zaf dejî antî, bedelê girdî dayî la resayî waştişê xo.

Dezgehanê Ewropa menga ravîyartî de kombîyayîş kerd û serrêke wext da dewleta tirke. Xora Ewropa 2014 de wina yew qerar girewtbi; mehkemeya ke Rayber Apo muhakeme kerdo, muhakemeyo raşt nêkerdo û ganî newera bêro muhakemekerdene.Îmrali Rayber Apoyî rê îşkence yeno kerdene, heme heqê ci yenê binpaykerdene. La Konseya Ewropa rixmo ke des serrî vîyartî qerarêk nêgirewt. Çunke Ewropa zî paştî dana Planê Çokdayîşî yê dewleta tirke. Înan hesab kerd ke dewleta tirke eşkena PKKyî tesfîye bikero û qir bikero û vat hinî hewce nêkeno ke  ê heqê hêvî bigîrê rojdemê xo. Coka paştî daye Tirkîya.  Hem wextê komplo de hem komployî ra dima paştî daye dewleta tirke.

Konseya Ewropa yewna serre wext da dewleta tirke. No yeno no mana; Şima eşkenê vera Rayber Apoyî îşkence bikerî, PKKyî werte ra wedarê, kurdan tesfîye bikerî. No qerar xizmetê nê keno. Yanî Ewropa wayîrê qerarê xo vejîyena.  Qeraro ke dewleta tirke vera Rayber Apo, PKK û kurdan ana caardene qerarê kombîyayîşê Kahîre yo. Dewleta tirke na çarçewe de sîyasetê tesfîye rayra bena. Dewleta tirke pêro şarê bînî qir kerdî têna kurdî mendî. Wazena kurdan zî werte ra wedaro. Coka heme îmkananê xo nê semedî ra şuxilnena. Ewro Rayber Apo wayîrê erjanê merdimîye, demokrasî û sosyalîzmî û erjanê azadîye vejîyeno. Coka ganî her kes wayîrê Rayber Apoyî vejîyo. Vera komplo û tecîrî vinderê, têkoşînê demokrasî û azadîye xurt bikerê. Semedê azadîya fîzîkîye ya Rayber Apoyî ganî têkoşîn bêro xurtkerdene.''