419 partî, rêxistinanê girseyê demokratîkî û komelê sivîlî Cemîyetê Rojnamegeran ê Başûrrojhelatî (GGC) de seba şinasnayîşê Îdareyê Xoserî yê Rojawanê Kurdîstanî bi sernameyê ''Rojawanî rê statu, şaran rê azadîye'' bi deklarasyonêkî kampanyaya îmzayan daye destpêkerdene. 

Hemsereko Pêroyî yê DBPyî Keskîn Bayindir zî tewrê deklarasyonî bi. 

Bayindirî tîya de qisey kerd û vist vîrî ke ewro serrgêra 10ine ya azadkerdişê Kobanê ya. Bayindirî vat: ''Ma zanenê ke ameyoxêko azad modelê Rojawanî de yo. Ganî ma wayîrê nê modelî vejîyê û statuyê Rojawanî biwazê. No model do pêroyê Sûrîye bixelisno.''

Bayindirî hêrişê barbarî yê dewleta tirke yê vera Awbendê Tişrînî şermezar kerdî. Bayindirî venga dewleta tirke da ke dişmenîya Rojawanî nêka û peynîya hêrişanê xo bîyara.  Bayindirî vat: ''Çareserîya meseleya kurdan, bi şinasnayîşê statuyê Rojawanî bena.''

Mehmet Emîn Ayî zî nameyê Kongreya Îslamê Demokratîkî (DÎK) ser o qisey kerd û vat: ''Modelê Rojawanî sey Peymana Medîne ya. Rojawan de şar û bawerîyî bi azadî pîya ciwîyenê. Heqê çewî çin o nê modelî hedef bikero.''

Serekê Pêroyî yê Partîya Însan û Azadîye (PÎA) Ahmet Kayayî zî dîyar kerd ke bi teda û zorbazîye meseleyêke çareser nêbena.

Hetkarê Serekîya Partîya Komunîste ya Kurdîsanî (KKP) Murat Danişî bale ante girîngîya yewîya kurdan ser û vat ke roje roja yewî ya.

Endamê Heyetê Rayberdişî yê Meclîsê Partîya Kede (EMEP) Umut Yegenî vat: ''Ma zanenê ke şertê haştîye yo esas bi têkoşînî beno.''