Hêrişê nîjadperestî yê vera kurdan dewam kenê. Mengêke verî Denîze Poyraz banê HDPyî ya Îzmîrî de ameye qetilkerdene. Hema ke dejê aye teze yo hewteyo peyên de Afyon, Konya, Marmaris û Anqara de vera kurdan hêrişê qirkerdişî ameyî kerdene.

Vizêr saetanê şanî de qezaya Meramî ya Konya de AKP-MHPyîjanê ke hêrişê keyeyêkê kurdî kerd 3ê înan cinîyî 7 kesî qetil kerdî. Grûba faşîsta ke 22 gulane de zî hêrişê keyeyê Dedeogullarî kerdbi, verî bi çeke 7 kesî kiştî û dima ra cenazayê înan vêşnayî.

Hemserekê Pêroyî yê DBPyî Keskîn Bayindirî derheqê hêrişanê nîjadperestan ê vera kurdan de qisey kerd.

Bayindirî vist vîrî ke seba ke meselaya kurdî nêameye çareserkerdene hêrişê winayênî yenê kerdene û vat: ''Nê hêrişî netîceya vatişanê îqtîdarî yê vera kurdan de yenê kerdene. Vatişê nîjadperest û faşîstî yê îqtîdarî pratîk de yenê caardene. Hêrişkarî dişmenîya hukmatî ya vera kurdan ra hêz genê. Nê heme rîyê polîtkayanê îqtîdarê AKP-MHPyî ra benê. Îqtîdar komelî cêser fîneno û sîyaset û ziwanê xo nayî ser o keno. Îqtîdar dezgehê dewlete û hukm ardî yew nûqta ke nê hêrişanê nîjadperestan nêvînayîşî ra yenê û  sey meseleyanê munferît û şexsî genê dest. Hukm xora bîyo sey leteyêkê nê qirkerdişan. Seba ke nê nê qirkerdiş û hêrişî bêrê vindarneyene ewro têne kurdî nê ganî heme muxalefet û hêzê demokrasîyî têbigerê bigerê, çîyêk bikerê. Eke verê nînan mero girewtene nê hêrişê sîstematîkî do zafêr bê. Eke vizêr vera qirkerdişê Îzmîrî dormeyanê cîyayan ra vengo pêt bivejîyayêne beno ke qirkerdişê Konya nêbîyêne.''