Heyetê Rayberdişî yê Merkezê Partîya Demokratîke ya Şaran (HDP) badê qirkerdişê Konya ke eynî keyeyî ra 7 kurdî ameyî qetilkerdene lez û bez banê merkezî de kom bi.

Gama ke kombîyayîş dewam kerdêne Hemserekê Pêroyî yê HDPyî Mîthat Sancarî kombîyayîşê çapemenîye de qisey kerd.

Hemserek Sancarî nê vatî: ''Ewro saetanê şanî de qezaya Meramî ya Konya de qirkerdişêk qewimîya. 7 kurdî hewayêkê barbarkî ameyî qetilkerdene. Xeylêk wexto ke hêrişê nîjadperestî dewam kenê.  Ziwanê nefret û tehrîqî yê îqtîdarî berpirsîyaro verên ê nê qirkerdişî yo. Îqtîdar xeylêk wexto HDP û kurdan sey hedefî ramojneno û bingeyê qirkerdişan amede keno.

Gama ke hemraya ma Denîze Poyraz ame qetilkerdene zî ma vatbi ke planê kaosî esto. Nê hêrişî heme netîceya eynî zîhnîyet û polîtîkyan de yenê kerdene. Ma verî zî sere de partîyê muxalefetî veng dabi hêzanê demokrasîyî ke verê nê hêrişan bêro girewtene.

Serê HDPyî ra vera kurdan polîtîkaya qirkerdişî yena rayraberdene. Hema çend roje verê ci Afyon, Anqara û Konya de hêrişî ameyî kerdene. Îqtîdarî herinda tedbîran de verê nê hêrişan akerd. Xora nê rê ma aceb nêmendî. Çunke ma zanê ke berpirsîyaro esas ê nê hêrişan îqtîdar o.

Seba ke înan vera nê polîtîkayanê axûyînan tewiro bitesîr ranêmojna rolê hêzanê demokrasî û partîyanê muxalefetî zî esto.  Ma nika reyna veng danê heme partîyanê muxalefetî û hêzanê demokrasîyî û vanê bêrê ma pêro pîya verê înan bigîrê. Şermezarkerdiş nêvejeno ganî tewiro zelal bêro ramojnayene.

Şarê kurdî têna nêyo. Şarê kurdî çirey vera hêrişan nêterseno û xo peyser nêanceno. Ma sey HDPyî ke îradeyê nê şarî temsîl kenê, wayîrê hêzê ke heqê cuye yê şarê kurdî bipawê. Ma têna nêyê, bêhêz nêyê. Ma hêzê xo şarê xo ra genê ke ma do heme planan pûç vejê.

Ma veng danê heme rayberanê partîyanê muxalefetî û hêzanê demokrasîyî ke wa bêrê Konya. Hêzê ma esto ke ma faşîzmî vindarnê û nîjadperestîye bin bifînê. Eke ma pêro pîya vajê hinî bes o, ma eşkenê nê qirkerdişan vindarnê.''