Hemserekê Pêroyî yê DBPyî Keskin Bayindir tewrê kongreya rêxsitina partîya xo ya Wanî bi. Kongre de pankartê sey “Me bi ciwantî destpêkir em ê bi ciwantî serbikevin”, “Em ê li hemberî tecrîdê berxwedana xwe xurt bikin! Girtîgehan azad bikin! Tecrîdê bişkînin”, “1925î ra heta  1999î ma çok nêda, do medê!”ameyî akerdene.

Badê qiseykerdişê akerdişî Keskin Bayindirî qisey kerd. Bayindirî nê vatî: ''Partîya ma DBP wayîrê herre, ziwan û nasnameyê xo vejîyena. Coka ma do bi DBPyî ser bikewê. Vera têkoşînê ma  hêrişî est ê û destkewteyê ma yenê destsernayene. La çar leteyanê Kurdîstanî ra heta Ewropa kurdî têkoşîn kenê. Kurdan çirey vera hêrişan çok nêda, do ewro ra tepîya zî çok medê.

Dinya şaranê mazlûman rê mergî ferz kena la têkoşînê şarê kurdî û têgêrayîşê azadîye yê kurdan cuyeya azade û bianore ano verê ma.  Xeta ma na ya û heta serkewtişî ma do têkoşîn bikerê. Serkewtişê kurdan nizdî yo. No têkoşîn do bi azadîya Rayber Abdullah Ocalanî ser bikewo. Ewro pêro dinya qala kurdan kena. Têkoşînê kurdan heta ronayîşê Kurdîstanê azadî do dewam bikero.

1ê teşrîna verêne ra nata çîyo newe kerd rojdemê xo. Selamdayîşî ra kenê ke çîyêkî neweyî vejî. Xete û tewirê kurdan zelal o. Azadîye, bi ziwanê dayîke perwerde û heqê cuye, qanûnê bingeyî yo demokratîk, heta ke Kurdîstan wayîrê statuyî mebo têkoşînê ma do dewam bikero. Eke ma verê xo mede Îmraliyî ganî ma verê xo bidê ça? Şarê kurdî bi Birêz Ocalanî dest pê têkoşînê azadîye kerd, do bi ey biqêdîno. Proseso ke Birêz Ocalan aktorê ci yo serkêş nîyo raşt  û samîmî nîyo. Eke nîyetê înan raşto Birêz Ocalan Îmrali de yo û muxatap o yo. Xora înan bi hêrişê vera mîtîngê Amedî û Dayîkanê Haştîye yê ke Silopîya de semedê haştîye ameyî têhet, nîyetê xo yê vera prosesî ramojna.''

Badê qiseykerdişê Bayindirî îdareyo newe yê DBPyî yê Wanî ame bewlîkerdene. Gunule Uzunay û Cemal Demir  sey hemserekanê neweyan ê DBPyî yê Wanî ameyî vîjnayene.