Parlamenterê Parlamentoyê Neteweyî yê Swîsre û endamê  komîsyonê karanê teberî  Fabîan Molînayî derheqê rolê Rayberê Şarê Kurdî Abdullah Ocalan û grevanê vêşanîye û çareserîye de, ANF’yî re qisey kerd. Molîna sîyasetê Tirkîya nêzdî ra teqîp keno û Teşrîna verêne ya 2018’î de Vakûrê Kurdistanî zî zîyaret kerdibi.

Molînayî Mêrdîn û Amed zîyaret kerdibi û derheqê nê zîyaretê xo de wina va: “ Ma xeylî heqê merdimahîye yê ke ameyê binlingkerdene tespît kerdî. Nika hîna zêde yenê kerdene. Sey nimûne; merdimê ke ma o wext tey qisey kerdîbî, pêro ameyê tepişnayene.Tirkîya de heqê merdimahî û demokrasî êdî çin ê û ameyê betal kerdene.''

GANÎ TECRÎD BÊRO WEDARITENE

Molînayî bale ante grevê vêşanîye yê ke bi rayberîya hemsereka KCD’yî  Leyla Guvene dest pêkerdî ser û va: “Her çiyî ra ver  wazena vaja ke ez paştdarîya dana pêroyê xoverdayoxanê grevê vêşanîye. Sîyasetmedarî nika grevê vêşanîye de yê; bi hewayêko heqdar xover danê. Çunke yew rayîro bîn nêverdayo ke merdimî bi polîtîka xo bipawê. Grevê vêşanîye musnenê ma ke şaro Kurd her çiqas zulm û zor bianco zî bêalternatîf nîyo. Qaso ke ez vînena bi hewayêko stratejîk dest bi nê çalakîyan kerdo. Seba ke tecrîdê serê  Ocalanî bêro şikitene kewtê grevê vêşanîye. No hedef bi xo zî hedefêko muhîm o. Ganî tecrîdê serê Ocalanî bêro wedaritene. Çunke Ocalan ke nêbo, Tirkîya de problemî çareser nêbenê .''

OCALAN WAYÎRÊ ROLÊKO MUHÎMÎ YO

Parlamenterê Swîsreyijî mucadeleyê Kurdan de rolê Ocalanî nîşan da û va: “ Çareserkerdişê problemê Kurdan de, Ocalan wayîrê rolêko muhîmî yo û bê ey çareserîye nêbena. Coka ez paştdarîya dana çalakwananê grevê vêşanîye. Wexto ke merdim rolê Ocalanî bîyaro çimanê xo ver, fehm keno. Naye ra zî tecrîd nêno qebulkerdene. Qedîyayîşê prosesê haştîye ra dima şerî newe dest pêkerd û heqê merdimahîye newe ra ameyî îxlalkerdene. Na rewşe bi xo zî musnena ke îhtîyacîya Tirkîya bi prosesê haştîye esta. No zî bi pêvînayîşê Ocalanî beno.“

Molînayî waşt ke wa komelê Tirkîya zî xo ra na perse biperso. “ Bê Ocalanî çareserîye bena yan nêbena?“ Molînayî va eke na perse ke rast bêro cewabkerdene problemî zî çareser benê.

Molînayî wina dewam kerd: “ Seba çareserîya demokratîke, îhtîyacîye bi Ocalanî esta. La çi heyf ke nîyetê Erdogan û AKP‘yî çin o ke problemê Kurdan çareser bikero û bi hewayêko demokratîk tê bigêro. Çunke Erdogan wazeno ke bi nê polîtîkayan netewperestan bifîyo lingan ser û bi no qeyde îqtîdarê xo bidomno. Tîya de muhîmîya polîtîkayanê Ewropa yê vera Tirkîya kewenê dewre. Ganî Ewropa Erdoganî ra vajo êdî bes o. Seba Tirkîya ya demokratîke û haştîye, ganî Ewropa zî tê bigêro. Erdogan hem Tirkîya hem zî Surîye de heqanê merdiman gêno binê linganê xo û hiqûqê mîyanneteweyî rê goşdarîye nêkeno. Seba naye zî ganî Tirkîya bêro şermezarkerdene û sîleh  û muhîmatê leşkerî ganî nêdîyê ci. “