Tepişteyanê PKK û PAJKî 27ê teşrîna peyêne de zîndananê Tirkîya û Vakurê Kurdîstanî de vera tecrîdkerdişê Rayberê Şarê Kurdî Abdullah Ocalanî û binpaykerdişê heqanê tepişteyan grevê vêşanîye dabi destpêkerdene. Grevê vêşanîye roja 60. de dewam keno.

Sereka ÎHDyî ya Îstanbulî Gulserene Yolerî û Hemserekê TUHAY-DER Marmara Husnu Taşî grevê vêşanîye yê tepişteyan ANFyî rê ercna.

Gulserene Yolserî ard ziwan ke xoverdayîş têna do pê têkoşînê komelkî ser bikewo.

Gulserene vat: ''Tecrîd îşkence yo û no tecrîd bi hawayêkê sîstematîkî Zîndanê Îmraliyî de û pêro zîndananê bînan de yeno caardene. Zîndanan de xeylêk mesele û binpaykerdişê heqan estê. Grevê vêşanîye nê meseleyan rê hîşyarîyêk a. Ganî grevê vêşanîye sey çalakîyêka eşkena tecrîd wedara nêro dîyene. Çunke tecrîd seba tay armancanê sîyasîyan yeno kerdene.Wezîfeyê verên ê hêzanê demokrasî û komelî caardişê têkoşînêkê derg û biplan o.''

Hemserekê TUHAY-DER Marmara Husnu Taşî zî vist vîrî ke grevê vêşanîye 108 zîndanan de vila bîyo û vat: ''Hukmat cewabê waştişanê tepişteyan nêdano. Tecrîd dewam keno. Hema zî pêvînayîşê avûkatan yeno astengkerdene. Hukmat tecrîd de israr keno û no tecrîd hînî vurîyayo sîstemê îşkenceyî. Tepişteyî hema zî maruzê tedayan manenê. Zîndanê Sîlîvrî û Kandira de sereştiş û destsernayîşî dewam kenê. Keyeyê tepişteyan qerqilîyenê. Keyeyî wa nêrazîbîyayîşê xo bi hawayêkê xurtî bimojnê. Ganî cade hukmat goş bido waştişanê tepişteyan ser. Ganî waştişê tepişteyan bêrê caardene. Eke zîndanan de rewşe biba giranêr mesuldarê ci hukmat o.''