Bedrîye Kuşa HDPyije karta sûre mojnaye Şaredarê AKPyî

Bedrîye Kuşa HDPyije kombîyayîşê Meclîsê Şaredarîya Akdenîzî de qisey kerd û derheqê destbendkerdişê 5 endamanê Meclîsî de karta sûre mojnaye Şaredarê Akdenîzî yê AKPyî Mustafa Gultakî.

28ê temuze de 5 endamê Meclîsê Şaredarîya Akdenîzî yê HDPyî ameybî destbendkerdene û dima vera dîyabî. Nê 5 endaman vizêr kombîyayîşê Meclîsê Şaredarîye de fotografê helanê destbendkerdişî yê bi nuşteyê 'Kelemçeya Demokrasî' û 'Kelemçeya Rantî' akerdî.

Kombîyayîş de Şaredarê Mersînî yê CHPyî Vahap Seçerî 5 endaman ra derbazbîyayîş waşt û îfade kerd ke destbendkerdişê înan karanê meclîsî de alozîye viraşte. Seçerî vat: ''Mersîn şaristanê aramî, haşitî û yewî yo. Ganî ma firsend nêdê xîretê alozîvetişî.''

Dima Endama Meclîsî ya HDPyî û Hemsereka HDPyî ya Mersînî Bedrîye Kuş qisey kerd û ard ziwan ke werte de sûcêk çin o, destbendkerdişê înan bi temamî yew senaryo bi. Kuşe vat: ''Destbendkerdişê ma ra dima kombîyayîş ame kerdene û seba rantî tay birî ameyî girewtene.''

Kuşe vist vîrî ke Şaredarê Akdenîzî yê AKPyî Mustafa Gultak roniştişê meclîsî yê 4ê temmuze de rixmo ke qanûnan de cayê ci çin o waştbi ke seba 'PKK rêxistinêka terorî ya yan nê' rayî bêrê şuxilîyayene. Kuşe vat: ''Rixmo ke 20 endamanê meclîsî heman çi kerd yan zî nêkerd têna 5 endamê HDPyî ameyî destbendkerdene. Ez venga nê 15 kesanê bînan dana ke wexto ke no çi qewimîya şima şerm nêkerd?''

Kuşe dima karta sûre akerde û vat: ''Ez na karte mojnena Şaredarê Akdenîzî Mustafa Gultakî.''