Hemserekê Kongreya Komelê Demokratîkî (KCD) û Wekîlê HDPyî Berdan Ozturkî hêrişanê îqtîdarê AKP-MHPyî yê vera Başûr û Rojawanî ser o ANFyî rê qisey kerd.

Ozturkî ard ziwan ke hêrişî bi hemkarîya PDKyî yenê kerdene û armancê înan çinkerdişê destkewteyanê kurdan o. Ozturkî vat: ''Nê hêrişî hêrişê îşxalî yê û seba înkarkerdiş û çinkerdişê kurdan bi destê AKP-MHPyî yenê kerdene. Şerê Rûsya-Ukrayna ra dima dewleta tirke wazena gaz û petrolê Başûrî bivisna destî. Bi taybetî hêrişanê DAÎŞî ra dima mîyanê kurdan de hişmendîya yewîya neteweyîye virazîyaye. La PDK bi hemkarîya winasêne keno ke destkewteyê kurdan çin binê. PDK nêeşkeno kurdan yan zî Kurdîstanî bipawo. Wextê referandumê Başûrî de îqtîdarê AKP-MHPyî Başûrî rê gefî werdbî  la PDK nika hemkarîy înan keno.''

Oztrukî vist vîrî ke hêrişê vera Şingal û Rojawanî zî dewam kenê û peyê nê planê hêrişî de Amerîka û Îngilîstan est ê. Ozturkî vat: ''Tirkîya bê destûrê Amerîka nêeşkena nê hêrişan bikera. Dewleta tirke wazena têna statuyê kurdan çin bikera. Amerîka û NATO zî wazenê herinda modelê Rojawanî de modelê PDKyî ronê û meverdê ke şar azad bibo. Erdogan vano ê do sûrîyeyîjan erdê înan de ca bikerê. No çi însanî nîyo. Nê merdimî key biwazê o çax agêrenê. Hetê bînî ra eke nê merdimî abigêrê kamca de do bêrê cakerdene? Erdogan ancî hesabê çinkerdişê kurdan keno. Multecîyî zî ney qebul nêkenê. ''