Berlin de qurbanê Terteleyê Dêrsimî ameyî yadkerdene. Aktîvîte de ame vatene çîyo ke vizêr Dêrsimî de bi ewro Kurdîstan de reyna yeno kerdene û ame vengdayene ke wa cayê goran û arşîvî bêrê eşkerakerdene.
Paytextê Almanya Berlin de qurbanê Terteleyê Dêrsimî ameyî yadkerdene. Hetê Nav-Berlin, Meclîsê Cinîyan ê Dest-Dan, Kongreya Înşa ya Dêrsimî, Feda û Yewîya Cinîyan ê Sosyalîstan ra Brandenburger Tor de aktîvîteyêke ameye kerdene.
Qiseykerdişan de ame vatene qirkerdişê vera elewîyan û kurdan hema dewam kenê polîtîkayê dirîyî yê Amerîka, NATO û Almanya ameyî şermezarkerdene. Eşkerayîye de ame virvîstene ke çîyo ke vizêr Dêrsimî de kerd ewro koyanê Kurdîstanî de pê şuxulnayîşê çeka kîmyewîye kenê û semedê vergirewtişê nê şerî ame vengdayene.
Xase Bingoltekin bi nameyê FEDA kirmanckî qisey kerd û nê vatî: ''85 serrî yo Tertelê Dêrsimî dewam keno. 85 serrî cuwa ver magarayan de cinî û domanê pê axû qetil kerdî. Ewro Kurdîstan û Şingal de reyna pê axû ma kişenê. Ma Dêrsim çirey xo vîr ra nêkerd. Na roje tim semedê ma roja sîyaye ya.''
Hetê bînî ra Hemserekê Nav-Berlini Huseyin Yilmaz û Temsîlkara Kongreya Înşa ya Dêrsimî Mehtap Erol verê Konsolosxaneyê Tirkîya de çelenga sîyaye naye ro.
