Serekwekîla Gruba HDPyî Merale Daniş Beştaş Meclîs de kombîyayîşê çapemenîye kerd. Beştaşa ke meseleyê muhîmî ke rojdem de yê ercnayî  bale ante ciwananê ke rîyê deyîra kurmanckî ra ameyî destbendkerdene ser û semedê protestokerdişî deyîra ''Yara mina Bedewe'' vate.

Merale Daniş Beştaş vat: ''Polîsê ke şîdetê serê cinîyan nêvindarnenê înan ê ke deyîra kurdkî vata verê înan genê. Kurdkî asteng kenê, qedexe kenê. Veyveyê ke tede deyîrê kurdkî yenê vatene yenê sereştene. Şima nêeşkenê nê ziwananê qedîman qedexe bikerê. Şima nêeşkenê ziwanê kurdkî qedexe bikerê. Deyîrê ma yê kurdkî do Colemêrg, Îzmîr, Îstanbul û Amed û heme cayanê bînan de bêrê vatene. Şima senî eşkenê deyîranê ke bi ziwanê mîlyonan kurdan yenê vatene qedexe bikerê? Ziwan leteyo tewr pîl ê estbîyayîşê merdiman o. Hema yaroje serekkomar Erdoganî derheqê muhîmîya ziwanî de qisey kerd. Têna semedê ziwanêkî nê semedê heme ziwanan o wina yo. Deyîra ke vizêr ameye qedexekerdene ra ez qismêk vajî. Ez naye semedê protestokerdişî vana. Ziwanî nêeşkenê bêrê astenkgerdene û qedexekerdene.''

Beştaşe dima ra bi kurmanckî vat: ''Ziwanê ma estbîyayîşê ma yo, ma do ziwanê xo yê dayîke bipawê'' û deyîra 'Yara mina Bedewe'' vate.