Paytextê Lubnanî Beyrût de vizêr nêmroj pêser di teqayîşî qewimîyayî. Selahîyetdaran pare kerd ke 73 kesî merdî û 3.700 kesî zî birîndar bîyî.  Mudirê Pêroyî yê Asayîşê Lubnanî Abbas Îbrahîmî bi eşkerayîyêke vat: ''Ma texmîn kenê ke teqaberê ke ma çend serrî verê cû dest nabi ser bîyî sebebê teqayîşan. La ma pabeyê netîceya tehqîqatî yê.''

Îsraîlo ke bi desan serrî yo ke vera Lubnanî operasyonê leşkerî keno da zanayene ke eleqeyê înan bi serebûtî çin o. 

Teqayîşê destpêkî ra dima teqayîşêko çetin qewimîya.Teqayîşo diyîn Qibris de zî ame eşnawitene.

Merdimê ke wextê teqayîşî de teber de bîyî, wextêk kerr bîyî. Lekeran û merdimanê zerrîwazan ê herême ra vetî. 

Selahîyetdarêkê leşkerî AFPyî rê qisey kerd û ard ziwan ke herême bi cesedan pirr bîye. Helîkopteran seba ke şewat hewna bikerê bi seatan kar kerd.

Bi beşdarîya Serekdewlet Michel Aounî Komîteya Berze ya Pawitişî û Serekwezîr Hasan Diabî kombîyayîşêko lezabez kerd. Welat de şîno neteweyî ame îlankerdene.

Rixmo ke teqayîşî ra çend saetî derbaz bîyî derheqê babete de eşkerayîyêke nêameye dayen. Serekwezîr Diabî vat: ''Mesuldarî do hesab bidê.''

Ajansê Xeberan ê Neteweyî Alma zî da zanayene ke teqayîş de xeylêk zerar resa Qesra Serekwezîrîye.

Hetê bînî ra adir kewt keştîyêka lîmanî labelê nêzanîyeno ke tede merdimî estbî yan ney.