Sendîyayê karkeran ê pîlî yê Brîtanya bi serran o ke seba Ocalanî kampanya kenê. Kampanya bi hawayekê fermîyî hetê sendîkayanê UNITE, GMB, FBU, ASLEF, TSSA, RMT, USDAW, PROSPECT, GFTU, PCS, EIS, TUC, THOMPSONS SOLICITORS, CWU û NEU ra yena kerdene ke bi mîlyonan endamê nê sendîkayan estê.

Sendîkayî xeylêk beşanê cîyayan ê komelî temsîl kenê. Înan ra yew zî PROSPECT o ke zanyar, hunermend, muhendîs û mudirî endamê ci yê. Nêzdîyê 183 hezar endamê ci estê. Thompsons Solicitorsî zî bi seyan avûkatan temsîl keno.

Kampanyaya 'Ocalanî rê Azadîye' serra 2016î de Kamaraya Avaman de pê eşkerayîyêke hetê sendîkayanê Îngilîstanî û Gale Unite The Union û Sendîkaya Karan ê Pêroyîyan (GMB) ra dîyaye destpêkerdene. Unite the Union wayîrê 1,5 mîlyon endamî ye û înan ra 800 hezarî endamê GMByî yê.

Tewr peyêne sendîkaya MUyî tewra kampanya bîye ke na sendîka zî 30 hezar muzîsyenan temsîl kena. Sendîka serra 1893î de şaristanê Manchesterî de ameye awenkerdene. Sendîkaya MUyî reyde menga gulane de beşê Unite South East Regional Committee, Unite Civil Air Transport Section, Unite Branch 7687, Unite Fylde Coast û Unite Doncaster NE/Sec1 zî tewrê kampanya bîyî.

Kampanyaya 'Ocalanî rê Azadîye' paştdayîşê Yewîya Muzîsyenan rê selam kerd. Kampanya îfade kerd ke muzîk pêro dinya de mîyanê dînamîzmê têgêrayîşanê komelî de pê rolêkê bingeyîyî têgêreno.

Eşkerayîya kampanya de ame vîrvistene ke têkoşînê vera rejîmê Apartheidî yê Afrîkaya Başûre de muzîk warê mîyanneteweyî de rolêk girewt xo serî. Eşkerayîye de wina ame vatene: ''Muzîkî vengê xo da vengê bêvengan û kerd ke neheqîya vera afro-amerîkananê Afrîkaya Başûre bêro dîyene û eşnawitene.''

Kampanya bale ante ser ke dewleta tirke xiwan, kinc û nameyê kurdan qedexe kerdî û serranê 1980an ra nata xeylêk kesê ke pê ziwanê kurdî deyîrî vatêne, tepiştî. Kampanya vat: ''Deyîrê azadîye her wext seba karkeran bîyî awazê têkoşînê mîyanneteweyî.''