Konfederasyonê Sendîkaya Kedkaranê Umûmîye (KESK) bi şîarê ''Ma nêeşkenê xo bidevirnê! Seba bucçeya goreyê merdiman, kede û şarî mil bi milî'' qezaya Kartalî ya Îstanbul de çalakîyêke kerde. Bi hezaran kedkarî tewrê çalakîye bîyî.

Xeylêk temsîlkarê partî û rêxistinanê komelê sivîlî zî çalakîye de amade bîyî. Wekîlê HDPyî Musa Pîroglu zî tewrê çalakîye bi. Çalakîye de sloganê sey ''Hukmat îstîfa bike'', ''Şerî rê ney kedkaran rê budçe'' ameyî vatene.

Hemsereka Pêroyî ya KESKî Şukrane Kaplan Yeşîl eşkerayîye wende. Yeşîle da zanayene ke îqtîdar û terefgîrê ci bi rehetî û luksî ciwîyenê la kedkarî nêeşkenê xo bidevirnê.

Şukrane Kaplan Yeşîl vat: ''Îqtîdar pê polîtîkayanê teda wazeno çimê şarî bitersno, pê qeyûman wazeno têkoşînê cinîyan bişikno. Her roje zîndanan ra cenazayî vejîyenê. Seke vera Garîbe Gezer ame kerdene cenazaya ma zî înan rê sey barêk a. Ma seba ke xo bidevirnê budçeya şarî wazenê. Ganî meaşo asgarî goreyê enflasyonî bêro eyarkerdene, zamî bêrê apeygirewtene, embazê ke bêhuqûqî ra karî ra ameyê vetene wa abigêrê wezîfeyê xo ser. Budçe wa şerî rê nê şarî rê bêra xerckerdene.''

Çalakîye pê govendan qedîyaye.