Avûkatanê Rayberê Şarê Kurdî Abdullah Ocalanî ra Îbrahîm Bîlmezî ANFyî rê qala Komployê 9ê Teşrîna Verêne ya 1988î kerde.

Bîlmezî bale ante paştdayîşê hêzanê hegemonîkan ê seba tecrîdî ser. Bîlmezî vat: ''Birêz Ocalan û PKKy seba hêzanê hegemonan tehluke bîyî û înan ganî nê tasfîye bikerdêne. Coka nê hêzan prosesê 9ê Teşrîna Verêne da destpêkerdene. Nê hêzan pêkerd ke Birêz Ocalan Sûrîye ra bişawê. NATOyî û Amerîka hêzêko pîl ver bi rojhelatê Dengizê Sipîyî rê şawitbi. Tirkîya hêzo leşkerî zêdînabi. Hetê bînî ra xîretê Îsraîlî zî est bîyî. Nê pêroyînan xîret kerdêne ke Ocalan tasfîye bikerê.

Bîlmezî îfade kerd ke Rayberê Şarê Kurdî Ocalanî çareserîya haştîyane ya meseleya kurdan pêşkêş kerda û vat: ''Hêzanê hegemonan seba menfaetanê xo waştêne ke şer dewam bikero. Axir Birêz Ocalan Sûrîye ra ame vetene. Ey verê xo da Ewropa. Seke Birêz Ocalanî vatbi ke o seba ke meseleya kurdan bi rayîranê haştîyaneyan çareser bikero şibi Ewropa. Ey waşt ke bi rayîrê dîplomasî têbigêro. O çax ey Atina, Moskova û Roma de seba pêvînayîşan venga heyetanê dewletan da. O çax PKKyî zî adirbirnayîş îlan kerdbi. Rixmê nê çîyan zî dewletanê Ewropa û Amerîka cewab nêda vengdayîşê ey. Reyna înan heqê multecîtîye zî nêda Birêz Ocalanî. Hêzanê hegemonan nêverda ke Rayber Apo meseleya kurdan çareser bikero. Hêzanê hegemonan paradîgmaya Ocalanî seba xo sey gefî dîye. Çunke na paradîgmaya winayêne bîya ke eşkena pêro meseleyan bi rayîrê haştîye çareser bikera. 

Ocalanî bi samîmîyetî seba haştîye xîret kerd. Peynî de 15ê Sibate de o ame ardene bi Tirkîya û erşawîya Zîndanê Îmraliyî. La her çi nêqedîya. Birêz Ocalanî Îmrali de zî seba haştîye xîret kerd. Ey bi tewirê xo verê şerê tirkan û kurdan girewt. Ewro komplo bi tecrîdî dewam keno. La Birêz Ocalanî qetî tewirê xo yê haştîyaneyî ra fek vera nêda û bi israrê xo yê çareserîya demokratîke sîstemê Îmraliyî pûç kerd. A raşte ey sîstemê tecrîdî pûç kerd.''