Avûkatanê Baroyê Huqûqî yê Asrinî ra Îbrahîm Bîlmez derheqê Komployê Mîyanneteweyî û tecrîdê Îmraliyî yê Rayberê Şarê Kurdî Abdullah Ocalanî de ANFyî rê qisey kerd.

Bîlmezî vist vîrî ke wextê Komployî de Ewropa berê xo Ocalanî rê qefilnayî û şexsê Abdullah Ocalanî de komplo vera haştîye, hêvîya haştîye ameyo kerdene. Bîlmezî vat: ''Komplo 23 serrî yo bi tecrîdê Îmraliyî dewam keno. Tecrîd qetî nêno qebulkerdene. Senî ke Ocalanî vera pêro serebûtan tewirê xo mojna, Îmrali de zî 23 serrî yo nê tewirê xo de israr kerd. Îmrali de huqûq çin o. Rixmê hende muracatan zî ma nêeşkenê muwekîlê xo ra xebere bigêrê. Dewletêka huqûqî de tecrîdêko winasên nêameyêne kerdene. Ocalan û muwekîlê ma yê bînî Îmrali de sey esîran tepişîyenê.''

Bîlmezî îfade kerd ke nêzdîbîyayîşê dewlete yê bi meseleyan kurdan û Îmraliyî heman ê û vat: ''Key tecrîd beno giran tedaya vera kurdan zî bena giranêr. Şarê kurdî zaneno ke teda 40 serrî yo nêeşkaya çîyêkî safî bikera. Coka no tecrîd bi hawayêkê xirabî tesîrê sîyasetê Tirkîya zî keno. Ganî peynîya na polîtîka bêra ardene. Tecrîdî reyde 23 serrî yo komplo dewam keno. Tecrîd resayo asta tewr xirabe. Adara 2021î ra nata ma nêeşkenê Ocalanî ra xeberêke bigêrê.

Na asta tecrîdî de rolê Mehkemeya Heqanê Merdiman a Ewropa (MHME), CPT û dezgehanê mîyanneteweyîyan esto. La nê dezgeh û sazgehî hema zî vera tecrîdî tewirêkê zelalî nêmojnenê. Eke bi tewirêkê xurtî vera Tirkîya teda biameyêne kerdene tecrîd do biqedîyayêne.''