Endamê Komîsyonê Zîndanan ê Komeleya Huqûqnasan a Seba Azadîye (OHD) Avûkat Veysî Eskîyî binpaykerdişanê heqanê tepişteyan ser o ANFyî rê qisey kerd. 

Avûkat Veysî Eksîyî ard ziwan ke qaşo vurnayîşê qanûnê bingeyî  yê îqtîdarî tepişteyanê sîyasîyan rê netîceyê giranî bîyardêne û vat: ''Îqtîdar vurnayîşê qanûnê bingeyî de pê nîyetêkê xirabî têgêreno. Seke wextê qanûnê efû de dîya cerg û sûcdarî vera dîyayî la bi hezaran tepişteyê sîyasî zîndan de mendî.''

Avûkat Eskîyî bale ante koxuşan de amadekarîya seba cakerdişê hacetanê veng û dîmenan ser û vat no zî binpaykerdişê heqan o. Eskîyî vat: ''Bi nê hawayî mahremîyetê tepişteyan do bêro binpaykerdene. Îdareyê zîndanan cara bi hawayêkê keyfî tepişteyan tecrîd kenê.''

Avûkat Eskîyî da zanayene ke tepişteyî keyeyanê xo ra dûrî zîndanan de yenê cakerdene û vat: ''No dûştê peymananê mîyanneteweyîyan  o. Ganî rayaumûmîya demokratîke, baro û dezgehê huqûqî vera binpaykerdişanê heqanê tepişteyan wurzê payan ser û têkoşîn bikerê. Kerdişê zîndanan hînî peynîya sebrê tepişteyan ano.''