Binpaykerdişê Kurkçulerî goreyê qanûnî yê!

Komîsyonê Etudkerdişê Heqanê Merdiman ê Meclîsî cewabê muracatê HDPyî yê derheqê binpaykerdişê heqan ê Zîndanê Kurkçulerî serreke ra dima da û vat: Çîyê ke ameyî kerdene goreyê qanûnî yê.

Parlamenteranê HDPyî Tulaye Hatimolgullari û Kemal Pekozî par derheqê binpaykerdişanê  heqan ê Zîndanê Tipê Fyî yê Kurkçulerî de raporo ke Komeleya Heqanê Merdiman ê Şubeyê Adana amede kerd kiriştbi Komîsyonê Etudkerdişê Heqanê Merdiman ê Meclîsî. Cewabê muracatî serreke ra dima ame dayene û ame îdîakerdene ke muameleyo xirab çîn o.

Raporê HDPyî de amebi vatene ke keyeyê tepişteyan yenê tehdîtkerdene û wexto ke vera naye vejîyenê raştê muameleyê xirabî yê gardîyanan yenê. Reyna memurê înfaz û pawitişî yê bi nameyê Akinî muameleyo xirab kerd. Heqê tepişteyan sey mektub û rojname yenê binpaykerdene.