Kiştox William M. (69) 23yê kanûne de hêrişê Merkezê Kulturê Kurdan ê Ahmet Kayayî, restaurantê kurdan û salona kuaforî kerdbî. Kiştox dima bi çeke amebi destbendkerdene.

Vizêr bira destbendkerdişî ya serê hêrişkerî wedarîyaye. Dozgerîya Parisî rewşa weşîye ya kiştoxî sey bahane mojna û pare kerd ke kiştox wedarîyayo Nêweşxaneyê Psîkîyatrî yê Mudirîya Asayîşê Parisî.

Eşkerayîye de wina ame vatene: ''Ewro nêmroje ra dima doktoran hêrişker muayene kerd û vat ke rewşa ey a weşîye goreyê tedbîrê destbendkerdişî nîyo.''

Dozgerîye vat ke coka wextê rewşa weşîye destûr da û heta şoro mehkeme tedbîrê destbendkerdişî ameyo wedaritene. Dozgerîye dîyar kerd ke tehqîqat dewam keno. Heman dozgerîye da zanayene ke tehqîqatê mîyanê roje de 'pênaseyê nîjadperestîye' ameyo esaskerdene. Bi vateyêkê bînî sûcê 'cînayetanê nîjadperestan û teşebusê cînayetan' sey 'serebûtêkê edlîyî' ameyo pênasekerdene.

Wezîrê Edaletî Eric Dupond-Morettiyî kombîyayîşê bi temsîlkaranê kurdan de vat ke pênaseyê 'kesayetê nîjadperestî' do cezaya zîndanî ya muebede nêvurno û ê tim Dozgerîya Antî-Terorî û Dozgerîya Parisî de têkilîye kenê.

Temsîlkaranê kurdan dîyar kerd ke 'hêriş hêrişêkê terorî yo' û pênaseyê tehqîqatî red kerd. Wezîr Morettiyî zî vatbi ke netîceya cigêrayîşî de goreyê unsuranê ke do bêrê destvistene beno ke pênase bêro vurnayene.