Brîtanya de kurd û elewîyî seba ke hûmaritişê nufusî  de eşkera bibê kampanyayan rayra benê. Hûmaritişê nufusî do heta 21ê adare dewam bikero.

Federasyonê Elewîyan ê Brîtanya venga pêro elewîyan da ke hûmaritiş de îbareya 'elewîyî' nîşan bikerê. Meclîsê Şarê Kurdan zî bi heman hewayî seba nîşankerdişê îbareya 'kurdî' veng da. Babete ser o elewî û kurdî seba ke hûmaritişê nufusî de tercîhê 'kurd' û 'elewî' bibê kampanyaya 'Ez kurd a' û 'Elewîyî estê, elewîtîye heq a' rayra benê.

Nê hûmaritişanê nufusî de semedo ke sey welat 'Kurdîstan' çinbi kurdî sey 'tirkan' ameyêne nîşankerdene. La hûmaritişê 21ê adare de kurdî hînî eşkenê îbareya  "Kurdish'' nîşan bikerê.

Federasyonê Elewîyan ê Brîtanya (BAF) derheqê kampanya de pê paştdayîşê dezgeh, rêxistin, roşnvîr û hunermendan 2 serrî yo bi taybetî Galler de xebatan keno. 

Serekê BAFî Îsrafîl Erbîlî pare kerd ke ganî elewîyî pê bawerîya xo bişinasîyê. Serekê Cemxane û Merkezê Kulturî yê Elewîyan ê Îngilîstanî Zeynel Akdoganî zî ard ziwan ke no qewimîyayîş tarîxî yo û ganî her kes paştî bido na kampanya. Sereka Merkezê Kulturî yê Elewîyan ê Enfieldî Zeynepe Demîr zî îfade kerd ke ê hê têkoşînê nasnameyî danê û sey awe û nanî hewceyê nasnameyê xo yê.

Hemserekê Meclîsê Şarê Kurdan Ercan Akbalî zî derheqê mesele de qisey kerd û waşt ke wa pêro kurdî tewrê hûmaritişî bibê û îbareya 'kurdish' biweçînê.

Akbalî vat: ''Girîng o ke ma nê hûmaritişî de xo sey kurd bidê qebulkerdene û îfade bikerê. Ma çend serrî yo seba naye têkoşîn kenê. Hînî ma eşkenê Brîtanya de îradeyê xo beyan bikerê û hetê sosyal, ekonomîk û kulturelî ra zî îradeyê xo eşkera bikerê.''