Dezgehanê kurdîstanî û têgêrayîşanê şorişgêrî yê Tirkîya  çarçewaya merhaleya dîyine ya hemleya ''Abdullah Ocalanî rê azadîye û meseleya kurdan rê çareserîya sîyasîye'' de London de eşkerayîya hempare daye.

Eşkerayîya de banê KCCyî de ameyî kerdene Meclîsê Şarê Kurdî yê Brîtanya û pabesteyê ci, KNK,Temsîlkarîya MSDyî, Temsîlkarîya Têgêrayîşê Goranî, Hemsereka Pêroya ya HDPyî ya verêne Serpile Kemalbay û Temsîlkarê Konfederasyonê Şaranê Demokratîkan ê Ewropa yê Brîtanya Mahmut Yoldaş tewrê ci bîyî.

Kombîyayîş de yo ke bi rêzgirewtişê semedê şehîdan dest pêkerd sloganê sey “Bijî Serok Apo” û “Jin Jiyan Azadî” ameyî vatene. Qiseykerdişê akerdişî hetê Hemserekê Meclîsê Şarê Kurdî yê Brîtanya ra ame kerdene. Dima ra eşkerayîya hempare ameye wendene.

Eşkerayîye de serra verêne ya hemle ameye selamkerdene û nê ameyî vatene: ''Rayberê Şarê Kurdî Abdullah Ocalan 26 serrî yo Îmrali de binê tecrîdî de yeno tepiştene. Bi sîstemê tecrîd û îşkenceyî  şexsê Rayber Apo de kurdê azadî yenê hedefgirewtene. Rayber Apoyî semedê şaranê Rojhelatê Mîyanênî û dinya, bitaybetî semedê şarê kurdî paradîgmaya seyyewbîne û haştîyane înşa kerd û semedê na paradîgma her roje têkoşîn keno. No têkoşîn semedê kurdîtîya azade xoverdayîşêk o. Dewaya netewa demokratîke semedê azadîya şaran bingeyêko esas o.

Hemleya Azadîye her hetî ra vila bibo zî hema ser nêkewta. Tecrîdo giran dewam keno û şarê kurdî nê semedî ra zaf qesawet keno. Serra dîyine ya hemle dîyaye destpêkerdene. Şarê kurdî her ca de wayîrê xoverdayîşê Rayberîya xo vejîyeno semedê azadîya ci têkoşîn keno. Kurdî bi seyan renganê xoverdayîşî têkoşîn kenê. Ma zî sey Meclîsê Şarê Kurdî yê Brîtanya veng danê heme şar û dostanê xo : Kampanyaya serra dîyine de aktîf ca bîgê . Ma dêsanê Îmraliyî bi hêzê xo yê rêxistinkerdeyî birijnê, Rayber Apoyî azad bikerê.''

Reyna kesê bînî ke tewrê kombîyayîşî bîyî înan zî qiseykerdişê xo de vera tecrîdê giranî hêrsê xo ard ziwan û semedê azadîya fîzîkîye ya Abdullah Ocalanî veng da ke wa têkoşîn bêro xurtkerdene.