Wekîlê HDPyî Kemal Bulbulî ANFyî derheqê problemanê elewîtîye û nizdbîyayîşê hukmatî de qisey kerd.

Bulbulî elewîtîye sey kulturî destgirewtiş  û cehdkerdişê pabestayîşê Wezîrîya Kulturî sey wirdîvînayîşê bawerîya elewîtîye hesibna û vat: ''Wezîrîya Kultur û Turizmî tim kulturî sey berê pereyî vîneno. Goreyê hukmatî kulturê elewîtîye çîyanê fîguratîfan ê sey sazcinayîş, semahgêrayîşî ra yeno pê. Ewnîyayîşo winayên wirdîvînayîş o. Elewîtîye xora mîyanê kultur de ca gena la têna pê kultuî nîna sînorkerdene. Bawerîya elewtîye senî ke AKP, Erdogan, Wezîrîya Kulturî tarîf kenê wina nîyo. Sey heme bawerîyanê bînan her çîyo cuyayî tede est o. Elewîtîye hetê sosyolojî, felsefe û bawerî ra tekîlîya merdimî bi merdim, dewlete, xoza, heqîqet, bimbarekî serûber kena û nê tekîlîyan pênas kena. Bawerîya elewtîye pabesteyê sunîtîye nîyo. Dîyanet  elewîtîye sey leteyêkê sûtînîye geno dest. Sunîtîya ke dîyanetî arda ra  hanefîyîye nîya. Wa komel nê hol bizano, no dînê dewlete yo. Camîyê ke hetê AKP, dîyanet û dewlete ra ameyî ronayene sey daîreyêkê dewlete şuxulyenê. Îbadetê îslamî têna sey nimajkerdiş yeno hesibnayene.''

Bulbublî ard ziwan ke sîstem bi xo problemê elewîtîye aferneno û vat:  ''AKP kurdan nêvîneno, elewîyan nêvîneno, cinîyan nêvîneno, nêvînayîş ra yeno. Problemê ke heta ewro nêvînayîşî ra yeno dekewtişê 2023 de lazabez kerdî yew çiwal ke senî ke çareser bikero. Eslê xo de nizdîbîyayîşo îslamofaşîst no yo. Vatişê faşîzmê dînî dahîna raşt o.  Verî ra sîstem pê cîyakerdişê probleman xebityeno. Wina geno dest ke çew vano qey eleqeyê probleman pê yewbînan çîn o. Problemanê sey elewtîye, cinî, ekonomî, kurd, perwerde û ciwanan cîya geno dest. Paştdayîşê Unîversîteyan ê vera qeyûmî sey 'teror' genê dest, paştdayîş şiknenê  û ruhê paştdayîşî helisnenê. Problemê elewîyan têna problemê elewîyan nîyo. Problemê elewîyan ê sîstemî yo. Sîtem bi xo problemê elewîtîye aferneno, bawerîya ci înkar keno û nê înkarî sey qanûnî tarîf keno.''

Kemal Bulbulî vat: ''Problemê elewîyîye têna problemê bawerî nîyo. Problemanê elewtîye, kurdan û cinîyan ra sîstemo faşîsto dînî est o. Heta ke no sîstem mero famkerdene û tehlîlkerdene problemî nînê çareserkerdene. Na çarçewe de problemêkê roşnvîranê Tirkîya zî est o. Problemê elewtîye têna sey problemêkê bawerî vînenî. Problemê elewîyan problemêko makropolîtîk o ke her hetî ra tesîrê komelî keno. Elewîyî hetê sîstemî ra zanaye feqîrîye rê ameyî mehkumkerdene. Raştê dersa dînîya bizorî yenê. Heqê ci yê bi ziwanê xo îbadetî çîn o. Cemxaneyan de  yeno waştene ke wa têna tirkî îbadet bêro kerdene. Cemxaneyan de kurd, ereb û romanî est ê. Qey ganî ma têna bi tirkî îbadet bikerê. Elewîyî kar de zî terfîya berzê nêgenê. Ma nê welat de est ê û heqê ma yê îdarekerdişê welatî est o. Astengkerdişê nê heqanê ma tecawuz o. Problemêko huqûqî yo. Çunke pê qanûnê tekke û zafîyeyan elewîtîye bîya qedexe. Faşîzm her hetî ra hêriş keno la roşnvîrê Tirkîya berpirsîyarîya xo nêanê ca. Ganî ma fîkê komelê ehleqî-polîtîkî yê Birêz Rayberê Şarê Kurdî Abdullah Ocalanî biresnê her kesî.''