Hemsereka Pêroyî ya HDPyî Pervîne Buldan çarçewa bernameyê Têkoşînê Demokratîkî de derbazê Qersî bîye û bînaya HDPyî ya Qersî zîyaret kerde. Buldane zîyaretê HDPyî de qisey kerd û bale ante xebatanê îtîfaqî ser. Buldane batalkerdişê wekîlîyan û tepişîyayîşê wekîlan şermezar kerdî û wina vat: ''Wekîlê CHPyî Enîs Berberoglu rîyê vîrusê Korona ra ame veradayene. La Leyla Guven û Musa Farisogullari hema zî tepişte yê. No bêedaletî û cîyakerî ya. Hema zî Leyla Guven, Musa Farisogullari, Selahattîn Demîrtaş, Fîgene Yuksekdag, Sebahate Tuncel û wekîlê bînî tepişte yê. Vîrus mabênê CHP û HDPyî de cîyakerîye nêkeno. Eke wijdan û edalet estê ganî tepişteyê sîyasîyî bêrê vera dayene.

HDP partîya pîle ya 3. ya Tirkîya ya ke rayê mîlyonan girewtî. Hêrişê vera HDPyî qelsîya AKPyî mojnenê. Wazenê HDP krîmînalîze bikerê. Partîya ma krîterê demokrasî û hastîye yê Tirkîya yo. Krîterê azadîya şaran o. No weçînayîşê 31ê adare de ame dîyene. Weçînayîşê bînî de HDP amade yo ke Tirkîya îdare bikero.

HDP peyê beran de nîqaşê îtîfaqî nêkeno. Şar naye qebul nêkeno. Berê ma seba îtîfaqî pêro partîyanê muxalefetî akerde yo. Ma do vera faşîzm û polîtîkayanê şîdetî têkoşînê xo yê demokratîkî berz bikerê.''