Hemsereka Pêroyî ya HDPyî Pervîne Buldan pîya bi sîyasetmedar Sirri Sakik û wekîlan banê Bahçelîevlerî yo ke raştê hêrişî ame zîyaret kerd.

Buldane vat: ''Welatê ma welatê dejan o. Tarîxê welatê ma pê qirkerdişan dekerde yo. Sey Roboskî bi desan qirkerdişî bîyî ke do çirey merê vîrakerdene. Ma kurdî tim raştê qirkerdişan yenê. Ma ne çirey nê dejî xo vîr a kerdî ne zî verê zaliman de çok da. Ma zaf hole zanê ke nê qirkerdişî hetê kamî ra yenê kerdene. Tam rojêke verê roniştişê Denîze Poyraz hêriş ame kerdene. Pê nê hêrişî ame waştene ke kurdî reyna dej biancê û mesaj bidîyo kurdan. Seba ke qirkerdişî nêrê eşkerakerdene tay hêzî kewte dewre. Înanê ke talîmat dayê eşkera yê. Êyê ke wazenê kaosê gonînî afernê wa bizanê ke HDP do vera nê hêrişan çirey peyser game nêerzo. Wa her kes bizano ke ma meydan tersûnêkan rê nêverdenê. Ê se kenê wa bikerê do çirey meeşkê ma bin bifînê.''

Pervîne Buldan wina dewam kerd: ''Xora hêrişkar têna nêame tîya. O ame şawitene. Çeke, kardî dayê destê ci û semedê qirkerdişê gonînî şawit. HDP partîya hîrêyîne ya parlementoyî ya û rayanê mîlyonan gena. Êyê ke tim partîya ma sey hedefî ramojnenê krîmînalîze kenê, heqeret kenê paştî danê hêrişkaran. Ê partîyê wirdî yê ke têna xoser nêeşeknê debikewê meclîs nêeşkenê partîya 3. ya Tirkîya rê heqeret bikerê. Ma roniştişê dewaya Denîze Poyraz de tewirê heyetê mehkeme eşkera dî. Ma dî senî kiştox yeno pawitene. Seba ke ma kiştoxî ra vato kiştox ma rê dewa akerde. Ma nêtersenê ma do tim bivengê berzî kiştoxan rê vajê kiştox. Waştişê ma oyo ke têna no kiştox nê hêzê ke peyê ci de bêrê muhakemekerdene. Qesawet mekerê, vera nê zaliman, vera nê faşîzmî ma do miheqeq ser bikewê. Çîyo muhîm oyo ke ma paştdayîş, têkoşîn, îrade û vindertişê xo yê qerardarî vînî mekerê. Ez reyna  birîndaranê ma rê şîfa wazenê û êyê ke paştdayîş danê ma wa weşûwar bê.''