Hêrişê vera banê HDPyî yê Bahçelîevlerê Îstanbulî de di kesî birîndar bîyî. Badê hêrişî HDPyîjî verê banê partîye de ameyî têhet û waşt Meydanê Şîrînevlerî de eşkerayîye bidê la polîsan destur nêda. Binê ablûqaya polîsan de çalakîya roniştişî ameye kerdene.

Hemsereka HDPyî ya Îstanbulî Îlknure Bîrol vera hêrişan nêrazîbîyayîş ramojna û vat: ''HDPyî çirey çok nêda û ewro ra tepîya do  çok nêdo. Wa mevajê ke pê mergî ma tersnenê. Ma şar ê. Senî ke ma verî zî nê planî pûç vetî ma do reyna wina bikerê. No zîhnîyeto faşîsto ke hêz destê ci de yo do nê welatî ra bêro esternayene.  Nê hêrişî sîstematîk ê. Bizanê ke ma do tim sereberz payan ser bê. Ma nêtersenê, milê xo çewt nêke û şima rê bîat nêkenê. Bi serran o rixmê heme rijnayîş û qirkerdişanê şima ma tîya de yê. Şima ra pîlêr şar esto. Şima ne eşkenê kurdan bitersnê ne zî şorişgêran rê çok bidê dayene.''

Wekîla HDPyî ya Zuleyha Gulum zî vat: ''Êyê ke verê qetilkaran nêgenê ewro reyna wazenê verê ma bîgirê. Şima se kenê bikerê ma do çirey peyser game meerzê.''

Hemsereyê Pêroyî yê HDPyî Mîthat Sancarî zî ba rêxistina Bahçelîevlerî zîyaret kerd. Sancarî ke tîya qisey kerd vist vîrî ke hêrişê raştê Qirkerdişê Roboskî û roniştişê dewaya Deynîze Poyraz ame û vat: ''Hêriş bi waştişê mirnayîşî ame kerdene.  Ma zanê ke pê nê hêrişan wazenê verê HDPyî bîgirê. Êyê ke HDPyî tim sey hedefî ramojnenî, berpirsîyarê nê hêrişî yê . Êyê ke pê kayanê leyminan kenê ke ma vindar wa bizanê ke do HDP qerardar rayîrê xo yê demokrasîyî rê dewam bikero û tewr peynî de vera înan ser bikewo.''