Bado ke hukmatê tirkî HDP sey hedefî ramojna vera banê HDPyî yê Bahçelîevlerê Îstanbulî hêrişo biçeke ame kerdene. Netîceya hêrişî de di kesî birîndar bîyî.

Goreyê zanayîşanê ke ameyî girewtene di hêrişkarê ke hema nasnameyê înan nêameyî tesbîtkerdene şîyî banê partîye û derheqê endamîye de persî pers kerdî. Gama ke Ramazan Dişarî înan rê çaye îkram kerdêne înan verî çaye rişnaye ey ser o û dima pê kardî hêriş kerd. Endamê partîye Azîz Şîmşekî ke kerd hêrişkaran vindarno o zî şenik birîndar bi. Hêrişkarî remayî şîyî nêzdîya bane partîye de kewtî firnêke. Dima ra polîsî ameyî û hêrişkarî destbend kerdî la ê sera berdî nîno zanayene.

Badê hêrişî Wekîla HDPyî Zuleyha Gulum û partîyijî ameyî banê qeza û Ramazan Dişaro ke birîndar bi derheqê babete qisey kerd. Dişarî vat hela ke ê çaye daye înan raştê hêrişî ameyo û hêrişkaro ke niştê ey ser vato 'ez ameya ke şima bikişî' û heqeretî kerd.  Dişarî vat ''Mi sîneyê xo ra darbe girewte. Embazanê ma kerd ke înan vindarnê û embazêkê ma yo bîn bi kardî birîndar bi.''

17ê hezîrane de qetilkar Onur Gencerî zî hêrişê banê HDPyî yê Îzmîrî kerdbi û xebatkare Denîze Poyraz qetil kerdîbî. Siba roniştişê dewaya Denîze Poyraz esto. Ecebo ke no hêriş zî raştê rojêke verê nê roniştişî ame kerdene.