Hemserekanê Pêroyîyan ê HDPyî Pervîne Buldan û Mîthat Sancar derheqê dewaya qefilnayîşî ya vera HDPyî û betalkerdişê wekilîya Omer Faruk Gergerlîogluyî de eşkerayîyêke daye. 

Hemserekan vat: ''Roja ke wekilîya Omer Faruk Gergelîogluyî ameye betalkerdene derheqê partîya ma de dewaya qefilnayî ameye akerdene. Hukmatê AKPyo ke mehkeme pabesteya ci ya, pê ci sîyaset dîzayn keno.

Dewaya qefilnayîşî ya vera partîya ma demokrasî û huqûqê welatî ra derbêka giran a. Nê hukmatî sey îdareyêkê darbekarî nameyê xo tarîxî de nuşt.

AKPyî na dewa sey dîyarîyêke daye kongreya MHPyî. Dzoger û mehkemeyî wa bizanê ke no hêz do bivurîyo û ê do vera huqûqî de hesab bidê. Nê qewimîyayîşî bêçaretîya AKP-MHPyî zî mojnenê.  Ê wazenê pê rayîrê HDPyî verê demokrasî bigêrê.

HDP têna partî nê fikrêk o zî. Bi mîlyonan merdimî dormeyê nê fikrî de yenê pêser. Hetê bînî ra AKP-MHP meşrûtîyetê xo yo demokratîk vînî kerd û nika zî pê zorbazî xîret kenê ke payan ser o bimanê. 

Ma venga pêro hêzanê demokrasî, muxalefetê sîyasî û komelkî danê ke vera darbeya sîyasî, tasfîyekerdişê huqûq û demokrasî têkoşînêkê hempar bidê.

Ma venga Heyetê Rayberdişî yê Merkezî yê partîya xo danê ke siba (ewro) tewrê kombîyayîşî bibo. Pê tradîsyonê têkoşînê tarîxî yê nikayênî ma do prosesê tarî ra derbaz bikerê. Ma pê bawer û qerardar ê. Bêguman ma do qetî ser bikewê.''