Çewlîg de AKPyî weçînayîşanê herêmîyan ê 2019î de bi 4 hezar û 6 rayê zafêrî şaredarîye vistbî destî û weçînayîşanê pêroyîyan de zî se ra 38.8ê rayan girewtbî û HDPyî zî se ra 30ê rayan girewtbî.

Aydin Burçuno 51 serre 2014 ra nata Endamê Meclîsê Şaredarîya Çewlîgî yo û bi serran o mîyanê karanê partîye de cagêno. Aydin Burçun Çewlîg de hemnamzedê şaredarîye yê DEM Partî yo. Çewlîg de bi serran o meseleya awe û çopan dewam kena. Burçunî ard ziwan ke bi paradîgmaya îdareyê herêmîyî ê do dewrêkê neweyî şaristan de bidê destpêkerdene.

Aydin Burçun 1973 de Çewlîg de dadîya xo ra bîyo. Ey 2014 û 2019 de BDP, DBP û HDPyî ra Meclîsê Şaredarîya Çewlîgî de endamîye kerde. 

Aydin Burçunî ANFyî rê qisey kerd û ard ziwan ke sey tradîsyonê sîyasî yê paradîgmaya partîye ê do karanê şaredarîye bingeyê şarperestîye û ekolojîye de bikerê.

Burçunî îfade kerd ke ê do pêro bernameyanê xo bi qerardarî bîyarê ca û vat: ''Ma do plananê bi roşnîya zanistîye bîyarê ca. Komîsyonê ma yê weçînayîşî do wextêkê nêzdî de karanê xo temam bikero û ma do projeyanê xo rayaumûmîye de pare bikerê. Ma do bi cinîyan, ciwanan û merdimanê xo yê eqilan yanî ma bi pêro dînamîkanê Çewlîgî têbigêrê. Çew nêmano ke ma do xo nêresno ci. Ma do pêro keyeyan zîyaret bikerê, pêro kuçeyan ra şorê. Ma seba zengînkerdişê tay kesan ney seba şarê xo bixebitê. Ma do şaredarîye şarê xo reyde îdare bikerê.''