Goreyê eşkerayîya Komîteya Vergirewtişê Îşkenceyî (CPT) mabênê tarîxanê 11-25 de şîyo Tirkîya û xeylêk zîndan û merkezanê destbendkerdişî de cigêrayîşî kerdê. CPTyî pare kerd ke heyetê înan nêşîyo Zîndanê Îmraliyî.

Buroyê Huqûqî yê Asrinî derheqê nêzdîbîyayîşê CPTyî de eşkerayîyêke daye.

Eşkerayîye avûkatan wina ya:

''Ma pê hesîyayî ke CPTyî 11-25ê çeleyî de Tirkîya zîyaret kerda û şîya tay zîndan û merkezanê destbendkerdişî. CPTyî ardo ziwan ke înan seba ke bizanê pêşnîyazê Îmraliyî ameyî caardene yan nê selahîyetderan reyde zî kombîyayîşî kerdî.

Zîyaretê CPTyî seba vergirewtişê îşkenceyî û caardişê heqanê merdiman girîng o.La ma wazenê bivisnê nê çîyan bivisnê vîrî;

CPTyî raporê xo yê 5ê tebaxa 2020î de da zanayene ke tecrîdê Îmraliyî yeno mana 'tecrîdê mîyanê tecrîdî' û nêno qebulkerdene. CPTyî o çax Tirkîya ra waşt ke tecrîd wa wedara. Hukmatê Tirkîya herinda ke goreyê nê pêşnîyazan têbigêra 7ê êlule de heqê pêvînayîşê telefonî, 23ê êlule de zî heqê pêvînayîşê keye û wasîyan qedexe kerdî. Yanî hukmatî têkilîye binî ra birnaye û tecrîdê Îmraliyî kerdo giranêr.

Ma derheqê na rewşe de agahîyî dayî CPTyî û seba ke waştişê raporî bêrê caardene ma muracatê huqûqê zereyî, Wezaretê Edaletî, Serekîya Dayîreyê Heqanê Merdiman û Mudirîya Pêroyî ya Zîndanan kerd. La qet yew cewab zî nêdîya muracatanê ma.

Zîndanê Îmraliyî ra ber CPT zîndanêkê tecrîdî yê bînî reyde muxatab nêbeno. Tecrîdo ke sîstemê îşkenceyî yo bira serra 2014î ra Mehkemeya Heqanê Merdiman a Ewropa (MHME)de bi hawayêkê eşkerayî yeno îfadekerdene. Na rewşe 1999 ra nata 8 zîyaretanê CPTyî de zî ameye tesbîtkerdene.

Rixmo ke CPTyî 2021 de zîyareyê xo yê Zîndanê Îmraliyî de rewşa tecrîdî eşkera kerda narey Îmrali zîyaret nêkerd. Goreyê ma no zîyaret kêm o. Çunke ê zî pê zanenê ke zîyaretê înan ra dima pêvînayîşê telefon, wasî û keyeyan ameyî qedexekerdene û tecrîd ame girankerdene.

Têgêrayîşê winasênî yê dezgehanê mîyanneteweyîyan kenê ke sîstemê îşkence û tecrîdî yê Îmrali bibo mende.

Zîndanê Îmraliyî têna seba Tirkîya nê seba pêro welatanê Konseya Ewropa mesuldarîyêk a û nê zîndanî de huqûq yeno binpaykerdene. Ganî cade caardişê keyfî û bêhuqûqî yê Îmraliyî bêrê wedaritene. Ma zî bi na wesîle reyna venga selahîyetdaran danê ke goreyê huqûqî têbigêrê û ma venga rayaumûmîye danê ke bi hawayêkê hîsgerî têbigêra.''