Buroyê Huqûqî yê Asrinî derheqê zîyaretê Komîteya Vergirewtişê Îşkenceyî (CPT) yê Tirkîya de eşkerayîyêka nuştekîye weşanaye.

Eşkerayîye de wina ame vatene:

''Heyetê CPTyî yê Konseya Ewropa dîyar kerdo ke 20-29ê êlula 2022yî de ameyo Tirkîya û şîyo zîyaretê Zîndanê Asayîşê Zêdeyî yê Îmraliyî.

Ma verî çend reyî pare kerdbi ke ma 25ê adara 2021î ra nata nêeşkenê muwekîlanê xo Abdullah Ocalan, Omer Hayrî Konar, Veysî Aktaş û Hamîlî Yildirimî ra xebere bigêrê û ma weşîya nînan ra qerqilîyenê. Nê warî de tek muxatab CPT yo. Xeylêk muracatanê ma, vengdayîş û xîretanê ma ra dima erey bîyo zî CPTyî gamêke eşte û goreyê ma na game gamêka pozîtîf a.

CPTyî tewr peyên gulana 2019î de zîyaretê Îmraliyî kerdbi û raporê nê zîyaretî 15 mengan ra dima weşanabi û tede ardbi ziwan ke bi taybetî ganî warê têkilîdayîşê teberî de gamê cidîyî bierzîyê. Zîyaretê CPTyî ra dima qaşo ganî goreyê pêşnîyazanê ci yê raporê zîyaretî rewşe biameyêne holkerdene la polîtîkaya tecrîdî ya vera muwekîlanê ma dewam kerd û tecrîd bîyo giranêr.

Ma zîyaretê CPTyî sey xîretêkê pozîtîfî vînenê û bi taybetî wazenê bala xo bidê nê çîyî ser ke 18 mengî yo ma nêeşkenê agahîyêke bigêrê û no çi raştîya nêgirewtişê agahîyan nêvurneno. Waştişê ma yo sereke no yo ke ganî qedexeyê pêvînayîşê b keye û avûkatan bêro wedaritene, bê sînor û astengî ma bieşkê muwekîlanê xo bivînê û ganî heqê pêvînayîşî rê hûrmet bêro mojnayene. Rixmo ke rewşa girane werte de ya, CPT ganî cade eşkerayîyêke bido rayaumûmîye û ganî tedbîr û prosedurê seba wedaritişê şertanê îşkenceyî bivisno dewre.''