Buroyê Huqûqî yê Asrinî derheqê tecrîdkerdişê Rayberê Şarê Kurdî Abdullah Ocalanî de eşkerayîyêke daye.

Eşkerayîye wina ya:

''3 serran ra heta ewro muwekîlê ma Birêz Abdullah Ocalano ke Zîndanê Îmraliyî de tepişîyeno, heqê xo yê tewr meşrûyî nêeşkeno bişuxilno, avûkatanê xo bivîno. Birêz Ocalan pêvînayîşê bi avûkatanê xo 27ê temmuza 2011î ra heta 2ê gulana 2019î rayêk zî nêeşka avûkatanê xo bivîno. 8ê teşrîna peyêne ya 2018î de zî netîceya grevê vêşanîye de tecrîdo mutlaq ê Îmraliyî tayêk ame şenikkerdene 2ê gulana 2019î û 7ê tebaxa 2019î de bi temamî di reyî Birêz Ocalan avûkatê xo dîyî. Nê panc pêvînayîşanê kilman de Birêz Ocalanî eşkera kerdbi ke o amade yo ke seba çareserîya demokratîke ya meseleya kurdan çi bikewo milê ey bikero, pê vengdayîşê ci grevê vêşanîye qedîya û mesajê ke rayaumûmîye pê zerrîrehet bîya, dayî.

Pêvînayîşê 2ê gulana 2019î ra dima 16ê gulana 2019î de Wezîrê Edaletî bi xo verê kamerayan de ardbi ziwan ke hînî pêvînayîşê avûkatan nêro astengkerdene. La pêvînayîşê 7ê tebaxa 2019î ra heta nika pêro muracatê ma yê seba pêvînayîşî ameyî redkerdene. Nê 3 serran de rayêk zî pêvînayîş nêame kerdene. Grevê vêşanîye yê ê çaxî û eşkerayîya Wezîrîya Edaletî zî mojnenê ke Îmrali de huqûq nê îradeyo polîtîk dîyarker o.

27ê temmuza 2011î ra heta 15ê temmuza 2016î xîretê darbe nê panc serran de muracatê pêvînayîşî bi bahaneya 'xirabîya hewayî' û 'xeripîyayîşê keştîye' ameyî redkerdene. Dima ke OHAL ame îlankerdene zî Hakîmîya Înfazî ya Bursa seba Îmraliyî bira qedexekerdişê pêvînayîşan daye. Bi nê hawayî reya verêne sîstemê huqûqî yê tirkan reya verêne seba astengkerdişê heqê temsîlîyetê bi avûkatan wedarit. 2004 de zî bi armancê astengkerdişê pawitişê avûkatan ê seba Ocalanî birî dîyabî. Na bire ra dima derheqê avûkatanê Birêz Ocalanî de vera bira qedexekerdişî dîyaye.

Wezîrê Edaletî 2019 de bi vateyê 'Verê pêvînayîşê Ocalanî û avûkatanê ci de astengêko huqûqî çin o' qestê nê qedexekeyanê OHALî û qedexeyanê bi 6 mengan kerdêne. Aye ra heta ewro yanî 7ê tebaxa 2022yî bi qedexeyanê otomatîkan destûr nêdîyeno ke ma muwekîlanê xo Birêz Abdullah Ocalanî, Birêz Omer Hayrî Konarî, Birêz Veysî Aktaşî û Birêz Hamîlî Yildirim bivînê. Ma bi taybetî wazenê îfade bikerê ke nê birê qedexeyî binê nameyê 'huqûqî' de a raşte şertanê madeyanê Qanûnê Înfazê Ceza nêanê ca.

Reyna bêhuqûqî û kefyîtîya tecrîdê Îmraliyî rê mîsalêko tewr eşkera zî no yo ke 3 muwekîlê ma yê bînî 2015 ra nata avûkatanê xo de pêvînayîş nêkenê. La nê muwekîlê ma Îmrali ra verî zîndananê bînan de tim eşkayî avûkatanê xo bivînê.

Ma sey avûkatanê ke nêeşkenê 17 mengan o muwekîlanê xo ra xebere bigêrê, sere de baroyan, rêxistinanê huqûq û heqanê merdiman, rayaumûmîye ra persenê ke na rewşe qey yena qebulkerdene? Sîstemê huqûqî de Zîndanê Îmraliyî qey sey qulikêka sîya yena qebulkerdene? Rayaumûmîya Tirkîya do heta key vera na bêhuqûqîye bêveng bimana? Ewro krîzê ekonomîk, komelkî û sîyasî yê Tirkîya netîceyê ney ê. Seba ke ma bibê dewletêka huqûq û demokrasî ma pawenê ke rayaumûmîye hînî n raştîye bivîna, neheqîye û bêhuqûqîye rê vaja hînî bes o û ma venga her kesî danê ke vera tecrîdê teberê merdimîye yê Înraliyî hîsger bibo.''