Buroyê Huqûqî yê Asrinî bi wesîleya zîyaretê Serekê Mehkemeya Heqanê Merdiman a Ewropa (MHME) Robert Spanoyî yê Tirkîya seba ke bale bianco rewşa Rayberê Şarê Kurdî Abdullah Ocalanî eşkerayîyêke daye.

Eşkerayîya Buroyî wina ya:

''Ma wextêkî ra nata îfade kenê sîstemê tecrîdî yê Îmraliyî bingeyê huqûqî yê Tirkîya yo. No tecrîd pêro Tirkîya rê yeno vilakerdene. Zîndanê Îmraliyî de krîterê neteweyî û mîyanneteweyî yê huqûqî nênê caardene.

Zîndanê Îmraliyî wayîrê ê statuyî yo ke heqê merdiman ê bingeyî yenê binpaykerdene. Hukmkerdişê Îmraliyî seba ke cezaya dardekerdişî bêra dîyene Abdullah Ocalanî bi hawayêkê formalîteyî ame kerdene.

MHME derheqê nê hukmkerdişî de bire daye ke heqê hukmkerdişî ame binpaykerdene. La Tirkîya na bire nêarde ca û Birê Ocalan newe ra hukm nêkerd. MHME bi pêşnîyazê îdarekaran ê tirkîyayîjan dosya qefilnaye. Sere de MHME pêro dezgehanê huqûqî yê mîyanneteweyîyan na serê na rewşe girewte.

Bira dardekerdişî ya MHME vurîyaye cezaya muebede. Serra 2014î de zî MHME bire daye ke muebedo girankerde îşkence yo. Rixmo ke na bire serî ra 6 serrî vîyartî hema zî Qanûnê Înfazê Ceza nêvurîya. MHME û Konseya Ewropa seba ke na bire bêra caardene bi hawayêkê aktîfî tênêgêrayî û  bi nê hawayî zî Tirkîya de Rejîmê Înfazî de vera tepişteyanê sîyasîyan kerdişê giranêrî ameyî kerdene. Rewşa pandemî de zî merdimê azadîya fikran rê zîndanan de yê la sûcdarê pîlî ameyî veradayene.

Muwekîlê ma Birêz Ocalan hem heqê ci yê hukmkerdişê edîlî ame binpaykerdene, hem binê rejîmê înfazî de yeno tepiştene hem zî vera ci tecrîdo giran yeno caardene ke no tecrîd hetê CPTyî ra sey 'zereyê ceza de ceza' ame pênasekerdene. Birêz Ocalan serra 2011î ra dima 8 serrî avûkatê xo nêdîyî. Serra 2019î de grevê vêşanîye ra dima reya verêne avûkatanê xo reyde pêvînayîş kerd. Ma serra 2011î de vera nê tecrîdî muracatê MHME kerd la hema zî muracatê ma binetîce nêbi.

Nê kerdişî şexsê Birêz Ocalanî de vera erjanê komelkî û sîyasîyanê ke Birêz Ocalan temsîlkarîya ci keno, yenê caardene. Nê kerdişê Tirkîya ra Sîstemê Huqûqî yê Heqanê Merdiman ê Ewropa zî mesuldar o. Îmrali her roje vurîyeno Guantanamo. Peymana Heqanê Merdiman a Ewropa û MHME  seba ke verê nê kerdişan bigêrê ameyî awankerdene.

Coka zîyaretê Birêz Serekî seba ke kerdişanê Tirkîya rî bi rî rexne bikero xeylêk girîng o. Eke tewiro winasên nêro mojnayene Tirkîya seba kerdişanê vera heqanê merdiman do bêra cesaretdayene.''