Ergun Akdogano ke 27 serrî yo zîndan de tepişîyayêne, Zîndanê Tekîrdagî de 13ê nîsane de gonîya mezgê ci rijîyabî û o wedarîyabi Nêweşxaneyê Tekîrdagî. Akdoganî 23yê gulane de zî dinyaya xo bedilnaye.

Cenazaya ey ameye berdene bi qezaya Xozatî ya Dêrsimî. Tîya de Cemxanetê Xozatî de merasîmêk ame kerdene û dima cenaza ameye berdene bi deweka Axweşî ya dewa Lolan Tanirî. 

Hemsereka DBPyî Çîgdeme Kiliçgun Uçar, îdarekarê DEM Partî yê Dêrsimî, Hemşaredarê Dêrsimî Cevdet Konak û xeylêk kesî tewrê definkerdişê cenaza bîyî.

Çîgdeme Kiliçgun Uçar merasîm de bale ante rewşa tepişteyanê nêweşan ser û vat: ''Zîndanan de tedayêka giranî est a la tepişteyî rixmê ney zî xo ver danê. Çunke ê bi azadîye bawer ê. Ma şexsê embaz Ergunî de wayîrê têkoşînê ziwan, nasname, azadî û erkê xo vejîyê. Wa soz bo ke ma do têkoşînê tepişteyan teyna nêverdê. Heta ke azadîye bêra ma do têkoşîn bikerê.''

Dima cenaza goristanê dewe de ameye definkerdene.