Tecrîdê vera Rayberê Şarê Kurdî Abdullah Ocalanî dewam keno. Komîteya Vergirewtişê Îşkenceyî ya Konseya Ewropa (CPT) 5ê tebaxa 2020î de raporê xo yê Îmraliyî eşkera kerd. CPTyî raporê xo de waşt ke rejîmê Îmrali ganî bi temamî bêro vurnayene.
Endamê Heyetê Rayberdişî yê Merkezî yê HDPyî Avûkat Cengîz Çîçekî  derheqê tecrîd û raporê CPTyî de ANFyî reyde qisey kerd.

Çîçekî vat: ''Girîng o ke CPTyî na babete ser o venga hukmatî da û îfade kerd ke sîstemê cezaya dîsîplînî ya Îmraliyî nêno qebulkerdene. Îmrali de cezakerdişê mîyanê ceza bingeyê dişmenî û îşkenceyê sîstematîkî yo. Tecrîdê Îmraliyî vera beno giranêr. Her kes zîndananê CIA yê Iraq, Çeçenîstan, Afganîstan û Bosna zaneno. Zîndanê Îmraliyî zî sey nê zîndanan îlegal o, qeydkerde nîyo. ''

Çîçekî ard ziwan ke sîstemê Îmraliyî hetê NATOyî ra virazîyayo. Çîçekî vat: ''Wextê îşxalê Iraqî de , wextê rijîyayîşê Sûrîye de seba ke verê kurdan bêro girewtene tecrîdê vera Birêz Ocalanî ame xurtkerdene. Wayîranê nê sîstemî Rojawan û Başûrê Kurdîstanî de vera têgêrayîşê kurdan berê hêrişanê leşkerî, sîyasî û îdeolojîkan akerd. Wexto ke vera Ocalanî tecrîd yeno xurtkerdene kurdan rê zî tedaya giraner yena kerdene.

Hetê huqûqî, merdimî û sîyasî ra rojdemkerdişê azadîya Ocaşanî bingeyo verên ê têkoşînê kurdan û rayaumûmîya demokratîk o. Ganî vatişê seba azadîya Ocalanî bi çêrî bêrê vilakerdene û seba azadîya Ocalanî têkoşînêko global bêro kerdene.''