Vendayîşê tarîxîyî yê Rayber Apoyî yê 27ê sibate û îlankerdişê qerarê adirbirnayîşî yê PKKyî yê 1ê adare aşmêke xo dima verdaye la hema zî hukmatî gamêka pête nêeşta. Hetê bînî ra şertanê Rayber Apoyî yê Îmraliyî qet bedilnayîşêk nêame kerdene.

Universîteya Akdenizî ra Profesor Dr. Cengiz Aktarî derheqê averşîyayîşê Sûrîye û munaqeşeyanê proses û dîyalogî yê Tirkîya de ajansê ma rê qisey kerd.

Cengiz Aktarî averşîyayîşê Sûrîye sey kaosî name kerdî û wina vat: ''Tirkîya wazena herême de qereqolan rono la Îsraîlê ke hêzê Amerîka girewto peyê xo vera nê projeyî yo. Îsraîl nêwazeno Tirkîya Sûrîye de bibo mende. Hema bewlî nêyo ke kam îdareyê Ahmed El-Şara ser o do dahîna zaf tesîr bikero.''

Aktarî bale ante qiseykerdişê  Hemsereka Konseya Rayberdişî ya KCKyî Besê Hozat ser û nê vatî: ''Îqtîdar vano ke ez do çîyêk medê. Xora çîyêk zî nêdayo. Qendîl zano no çîyo. Eşkerayîya peyên a Besê Hozat zaf eşkera û zelale bî. Îqtîdar semedê caardişê waştişê kurdan îredayo sîyasî ranêmojneno.''

Cengiz Akdarî wina dewam kerd: ''Îqtîdar geme nêerzeno çunke dest û lingê ci giredaye yê. Xora vat ê nêeşkenê. Vengdayîş keno la peyê ci de nêvendeno. Îqtîdarê antîdemokratîkî ra nîno pawetene ke gamenê semedê heqanê merdiman û demokrasîyî bierzo.

Mîtîng û çalakîyanê ke semedê Îmamogluyî yenê kerdene de dişmenîya vera kurdan est a. Pêro mekerê zî qismêk dişmenîya kurdan keno. Yanî Tirkîya de topyekun yew muxalefet  çîn o.

Qederê Devlet Bahçeli û Tayyip Erdoganî yew o. Nîyetê înan çîn o ke bi vjînayîşî îqtîdarî caverdê. Xora caverdayîşê înan zî mumkun nîyo. No şebekeyêkê sûcî yo. 20 serrî yo çîyê teberê qanûnî ke înan nêkerdo nêmend. Ê zî zanê ke eke îqtîdar bigino war ê cade yenê tepiştene.''